Biełaruś znoŭ nie patrapiła ŭ finał «Eŭrabačańnia»
Udzielnica «Eŭrabačańnia-2006» ad Biełarusi Palina Smołava nia trapiła ŭ finalnuju častku hetaha mižnarodnaha konkursu, što prachodzić u Hrecyi. Pozna ŭviečary 18 traŭnia hladackaja aŭdytoryja nievysoka acaniła konkursnuju pieśniu biełaruski pad nazvaj «Mama», u vyniku čaho i pieśnia, i artystka akazalisia pa-za mrojnaj dziasiatkaj finalistaŭ.
Udzielnica «Eŭrabačańnia-2006» ad Biełarusi Palina Smołava nia trapiła ŭ finalnuju častku hetaha mižnarodnaha konkursu, što prachodzić u Hrecyi. Pozna ŭviečary 18 traŭnia hladackaja aŭdytoryja nievysoka acaniła konkursnuju pieśniu biełaruski pad nazvaj «Mama», u vyniku čaho i pieśnia, i artystka akazalisia pa-za mrojnaj dziasiatkaj finalistaŭ. Heta ŭžo treciaja sproba Biełarusi «ŭklinicca» ŭ eŭrapiejskuju muzyčnuju pop-elitu: u papiarednija hady na stadyi paŭfinału adsiejalisia duet «Alaksandra j Kanstancin» i śpiavačka Anžalika Ahurbaš.
Adjezdu Paliny Smołavaj u Afiny papiaredničała aktyŭnaja reklamnaja kampanija ŭ dziaržaŭnych drukavanych i elektronnych medyjach. Niekalki razoŭ na dzień biełaruskija kanały «krucili» anhłamoŭnuju konkursnuju pieśniu «Mum», a taksama rolik, u jakim starejšaj siabroŭcy davała nakazy pieramožca dziciačaha «Eŭrabačańnia-2005» Ksienija Sitnik. A voś u biełaruskaj častcy telekanału «MTV» Smołava adsutničała. Kiraŭnik prajektu «MTV-Biełaruś» Valik Hryško kaža, što takoj «hańbie» ŭvohule nia miesca ŭ efiry.
(Hryško: ) «Usio heta čakana, ničoha dziŭnaha. A ŭvohule – hańba. Ja pierastaju ŭžo razumieć, jak u nas adbirajuć na konkurs vykanaŭcaŭ. Pierakanany: u Hiuneš Abasavaj našmat cikaviejšaja była pieśnia. Dyj sama Hiuneš kudy cikaviejšaja. Heta kali kazać pra papularnych vykanaŭcaŭ. Atrymaŭsia ž zusim inšy varyjant – haniebnaja pieśnia, haniebnaje naahuł usio, što z hetym konkursam u nas źviazana. Hetym, pieradusim, musiać zajmacca daśviedčanyja pradusary. Nie zvyčajnyja hledačy pavinny vybirać, na ichnuju dumku, lepšaha artysta, a pradusary. A ŭ nas – atrymlivajecca – kidajucca sa skrajnaści ŭ skrajnaść».
Tym nia mienš, u Biełarusi Palina Smołava zapatrabavana. Jana – aktyŭnaja ŭdzielnica prapahandysckich kancertaŭ «Za Biełaruś» na padtrymku Alaksandra Łukašenki. Letaś u składzie delehacyi BRSM Smołava vyjaždžała ŭ Venesuełu na festyval moładzi j studentaŭ. Za publičnuju padtrymku režymu pradstaŭniki apazycyi vystupali z prapanovaj uklučyć śpiavačku ŭ lik asob, jakim zabaronieny ŭjezd u krainy Eŭraźviazu. Heta mahło pastavić pad pytańnie j sam udzieł Smołavaj u «Eŭrabačańni».
Darečy, uskosna nielajalnaść da prychilnikaŭ Łukašenki adčuła na sabie j letašniaja ŭdzielnica konkursu Anžalika Ahurbaš: hreckaja ambasada tolki ŭ dzień zaplanavanaha adlotu ŭ Afiny vydała vizy siamiejnaj pary Ahurbašaŭ, jakija ŭrešcie spaźnilisia na samalot, i ŭ Hrecyju nie palacieli. (Cikava, što muž i fundatar śpiavački Mikałaj Ahurbaš uvieś čas padkreślivaje: maŭlaŭ, jon – etničny hrek.)
Jury Padolski, pradusar i baćka minułahodniaj udzielnicy «Eŭrabačańnia» ad Rasiei Natali Padolskaj prahnazuje, što bližejšym časam u aficyjnaj biełaruskaj presie źjaviacca artykuły, jak Biełaruś čarhovym razam «zasudzili». Ale spadar Padolski pierakanany: što mahčyma ŭ Biełarusi, – nievierahodna dla Zachodniaj Eŭropy.
(Padolski: ) «Ja liču, što tam uvohule nia moža być subjektyŭnaści. Razumiejecie, jak usio pracuje? Staić kamputar u niejkaj krainie (dapuścim, u Brytanii, Francyi j h.d.) – i jany padsumoŭvajuć hałasy pa krainie. Navošta Italii ci Bośnii – skažam – kolkaść hałasoŭ katoraha zamiežnaha ci ŭsich zamiežnych udzielnikaŭ? Tam paprostu nie pryniata «machlavać». Heta ŭ nas tak robiać (i apošnim časam, darečy, vielmi raspaŭsiudžana): vydavać niekamu žadanaje za realnaje dla ŭsich. A tam hetym nie zajmajucca. Tam vielmi surjoznyja nastupstvy, kali vypłyvuć na pavierchniu padobnyja rečy. Nichto nia budzie ryzykavać».
Finał śpieŭnaha konkursu «Eŭrabačańnie-2006» u Afinach adbudziecca 20 traŭnia. I znoŭ – bieź biełaruskaha ŭdziełu.