Madura paraŭnaŭ siabie z Chusejnam — tolki žyvym
Prezident Vieniesueły Nikałas Madura ŭ piatnicu paraŭnaŭ siabie z byłym prezidentam Iraka Sadamam Chusejnam, pakaranym paśla źviaržeńnia režymu pry ŭdziele ZŠA.
AFP
«Ja padobny da Sadama Chusejna… žyvoha Sadama Chusejna», — zajaviŭ Madura, vystupajučy ŭ Karakasie. Jaho vystup nacyjanalnaje telebačańnie tranślavała. Jak adznačaje RIAN, pry hetym jon byŭ apranuty ŭ plamistuju vajennuju formu i čyrvony desantny bieret.
Chusejn, jaki taksama lubiŭ vajennuju formu, byŭ skinuty ŭ krasaviku 2003 hoda paśla ŭvarvańnia ŭ Irak vojskaŭ kaalicyi na čale z ZŠA i Vialikabrytanijaj. Viarchoŭny sud Iraka vystaviŭ jamu abvinavačańnie ŭ hibieli ŭ 1982 hodzie 148 žycharoŭ vioski Ad-Dudžejl. Jon byŭ prysudžany da śmiarotnaha pakarańnia, prysud byŭ pryviedzieny ŭ vykanańnie ŭ kancy śniežnia 2006 hoda.
U Vieniesuele z pačatku krasavika iduć masavyja pratesty paśla pastanovy Viarchoŭnaha suda surjozna abmiežavać uładu nacyjanalnaj asamblei parłamienta krainy. Prychilniki apazicyi vyjšli na vulicy z patrabavańniem adstaŭki členaŭ suda i praviadzieńnia daterminovych vybaraŭ. Jany taksama vystupajuć suprać sklikańnia ŭstanoŭčaha schodu, ličačy heta sprobaj źmianić kanstytucyju. Pavodle aficyjnych danych, za miesiacy pratestaŭ u vyniku sutyknieńniaŭ z pravaachoŭnikam zahinuli bolš za 90 čałaviek.