«Miemaryjał» paviedamiŭ pra źnikłych čačencaŭ, jakich, mierkavana, rasstralali
Pravaabaroncy paćvierdzili zatrymańnie 13 čałaviek u Čačni, jakija, pa dadzienych «Novaj haziety», paźniej byli «spantanna» rasstralanyja ŭ Hroznym, paviedamlaje dw.com.
Pravaabarončy centr «Miemaryjał» paćvierdziŭ zatrymańnie ŭ Čačni 13 čałaviek, jakija, pa dadzienych «Novaj haziety», paźniej byli rasstralanyja. Jany byli zatrymanyja 17—18 śniežnia 2016 hoda abo ŭ studzieni 2017 hoda, paviedamlajecca na sajcie arhanizacyi ŭ paniadziełak, 24 červienia.
Los i miescaznachodžańnie 9 ź ich zastajecca nieviadomym ich svajakam, susiedziam i znajomym. Jašče ab adnym zatrymanym svajakam nieaficyjna paviedamili, što jon «pamior ad sardečnaha prystupu», paviedamlajuć pravaabaroncy. Jašče pra traich u pravaabarončym centry pakul nie majuć nijakich dadatkovych źviestak.
«Hetaja infarmacyja ŭskosna paćviardžaje paviedamleńnie «Novaj haziety» ab biassudnym pakarańni. Adziny sposab pierakanaŭča abvierhnuć takija padazreńni — pakazać usich hetych ludziej žyvymi», — skazana ŭ paviedamleńni «Miemaryjału».
Śpis 27 čałaviek, mierkavana rasstralanych u Hroznym, «Novaja hazieta» apublikavała 9 lipienia. Pavodle jaje infarmacyi, jany byli «spantanna» rasstralanyja ŭ noč na 26 studzienia 2017 hoda ŭ Hroznym paśla zatrymańnia palicyjaj.
«Hetyja ludzi byli zatrymanyja padčas niekalkich śpiecapieracyj, praviedzienych u Čačni paśla 17 śniežnia 2016 hoda. Im nie pradjaŭlałasia nijakich aficyjnych abvinavačvańniaŭ. U dačynieńni da hetych ludziej, jak, ułasna, i ŭ vypadku z hiejami, chutčej za ŭsio, było pryniata rašeńnie ab likvidacyi», — paviedamlała vydańnie. Pa dadzienych haziety, havorka moža iści ab 56 žycharach respubliki.