Abłasny sud admianiŭ prysud pa spravie ab chatnich rodach u Viciebsku
Viciebski abłasny sud admianiŭ prysud pa spravie ab chatnich rodach u dačynieńni da Volhi Ściapanavaj.
Pra heta paviedamiła žurnalistam aficyjny pradstaŭnik abłasnoha suda Natalla Płatonienka, piša BiełTA.
«Z pryčyny nieadpaviednaści vysnovaŭ suda, vykładzienych u prysudzie, faktyčnym abstavinam spravy, jakija mahli paŭpłyvać na rašeńnie suda, prysud suda Čyhunačnaha rajona admienieny i nakiravany na novy sudovy razhlad u sud pieršaj instancyi», - skazała Natalla Płatonienka.
7 vieraśnia sud Čyhunačnaha rajona pryznaŭ vinavataj žycharku Sankt-Pieciarburha Volhu Ściapanavu, jakaja naradziła dačku ŭ kvatery svajoj maci ŭ Viciebsku. Dziaŭčynka nieŭzabavie pamierła ŭ balnicy — zadychnułasia ŭ kalapłodnych vodach.
Sud prysudziŭ žančynu da 6 miesiacaŭ pazbaŭleńnia voli ŭ kałonii-pasialeńni. U termin adbyćcia pakarańnia zaličylisia čatyry miesiacy ŭtrymańnia pad vartaj (z 6 maja pa 7 vieraśnia) z raźliku adzin dzień da adnaho dnia. Ale mieru strymańnia źmianili na padpisku ab niavyjeździe, tamu Volhu vyzvalili ŭ zale suda.