Startavała kampanija «Litara Ŭ patrabuje dapamohi!»
U Biełarusi na płatformie talaka.by startavała kampanija «Litara Ŭ nieskładovaje patrabuje dapamohi!»
Što takoje Ŭ nieskładovaje dla biełarusaŭ? Heta nie prosta adna ź litar ałfavita! Heta toje, što vyłučaje biełarusaŭ siarod inšych nacyj. Litara Ŭ nieskładovaje heta toje, što robić nas admietnymi.
Biełaruś — adzinaja kraina ŭ śviecie z pomnikam litary Ŭ nieskładovamu (Połack).
«Ŭ nieskładovaje», miž inšym, heta i ajčynny hurt.
30 śniežnia 2017 i 4 studzienia 2018 u Minsku adbuducca probnyja dziciačyja śviatočnyja imprezy «Kazka pra litaru Ŭ nieskładovaje, jakaja ŭratavała Kalady i Novy Hod» (Navahodniaja kazka na rodnaj movie dla dziaciej i baćkoŭ).
Kazka «Jak litara Ŭ uratavała Kalady» — heta novy dziciačy muzyčna- teatralny prajekt Ramana Arłova, viadomaha pa «J:MORS», «U nieskładovaje», miuzikle «Čaradziej».
Što moža zdarycca sa zvyčajnymi biełaruskimi dziećmi (a moža navat i ich baćkami) ŭ navahodniuju noč, kali jany zbłytajuć Dzieda Maroza ź Ziuziem, Śniahurku ź Lolaj, i nie paznajuć Žyžala i Maru?
Duchi biełaruskaha suśvietu spyniajuć čas… i sonca nie moža ŭzyści, a značyć Novy Hod i Kalady nikoli nie pryjduć!
Ale Jaśka i Janinka mohuć vypravić situacyju, kali chucieńka vyvučać biełaruskuju mifałohiju, asabliva kaladnuju. Patrebna adkazać na šmat pytańniaŭ, prajści vyprabavańni, i sabrać čaroŭnyja litary ŭ słovie «NADYŠOŬ». Asabliva ciažka znajści apošniuju — «Ŭ nieskładovaje»…
Litara chavajecca ŭ Čaroŭnym Kaladnym Bary, i pakul Janinka nie znojdzie «Ŭ nieskładovaje» — Novy Hod i Kalady nie nadyduć…
A Ziuzia, Lala, Žyžal, Mara dy inšyja duchi biełaruskaha kosmasu dzieciam dapamohuć.
I kazka vierniecca! I Novy Hod z Kaladami nadyjduć!
Srodki źbirajucca ŭ pieršuju čarhu dla nabyćcia kaściumaŭ i dekaracyj, zapisu kampazicyj, bo płanujecca arhanizavać pakazy biełaruskamoŭnych śpiektaklaŭ na pastajannaj asnovie, kab nie tracić hrošy na arendu, pišuć arhanizatary.
«Chočacca pravieści kazki pra litaru Ŭ nieskładovaje na naležnym uzroŭni. Na žal, my nie majem padtrymki dziaržavy i bujnych sponsaraŭ. Ale vielmi pryjemna ździviŭ vodhuk našych partnioraŭ, dziakujučy jakim my zmahli apieratyŭna raźmiaścić rekłamu imprezy ŭ mietro i na inšych kanałach. Viadomy mieniedžar Vital Supranovič biez pytańniaŭ, apieratyŭna padklučyŭsia i vielmi mocna dapamoh na starcie, chacia zrazumieła, što na dadzienym etapie heta stratnaje mierapryjemstva.
Muzyka Valik Hryško biaspłatna zrabiŭ aŭdyjo i videa-rolik
A hurt «Bieź Bileta» navat vyrabiŭ mini-klip na svaju novuju biełaruskuju pieśniu «Śviatočnaja» pa matyvach našaha rolika
Pakul heta vyhladaje jak sapraŭdny narodny prajekt, jaki patrebny ŭsim nam. Ale biez bolšaj padtrymki my nie zmožam pravieści ŭsio na vysokim uzroŭni i lepiej za inšyja imprezy. A biełaruskaje pavinna być jak raz na paradak vyšej pa jakaści! My hladzim u budučyniu, vierym što prajekt budzie raźvivacca, jak i buduć raści našyja dzietki biełarusami, jakija viedajuć pra litaru Ŭ nieskładovaje i nie tolki» — adznačaje Raman Arłoŭ, pradusar prajekta.
U zaležnaści ad sabranych srodkaŭ, arhanizatary dadatkova płanujuć źniać videa-viersiju śpiektakla dla dalejšaha raspaŭsiudžvańnia ŭ internet, na dyskach, pakazach pa televizii.
Kali ŭdasca sabrać 5000 rubloŭ, arhanizatary abiacajucca pravieści biaspłatny pakaz dla małazabiaśpiečanych katehoryj nasielnictva.
«Takim čynam, my źbirajem minimum 1000 rubloŭ, zadača maksimum 5000 rubloŭ. My vierym, što hety cud moža adbycca! Inačaj navošta žyć:)
Prapanova budzie cikavaja jak fizičnym, tak i jurydyčnym asobam, zacikaŭlenym u rekłamie svaich pasłuh.
Achviaravać možna ad 5r. da 20r., ad 50r. da 100r., ad 500r. da 5000r.
Achviaravańni z opcyjami biaspłatnych kvitkoŭ vy možacie padaravać siabram i znajomym, jakija nie cikaviacca biełaruskaj kulturaj, dla naviedvańnia śpiektakla, mahčyma jany adkryjuć dla siabie dzivosny śviet biełaruskaj movy», — kažuć arhanizatary.
Padtrymać prajekt mahčyma i prosta nabyŭšy kvitki praz kvitki.by, ticketpro.by ci smsbilet.by.