Halijaf nervujecca
Ssunuŭšy hałasavańnie na sakavik, ułada paradaksalnym čynam zaśviedčyła, što sprava apazycyi nie zusim hibłaja. Piša Alaksandar Kłaskoŭski.
Ssunuŭšy hałasavańnie na sakavik, ułada paradaksalnym čynam zaśviedčyła, što sprava apazycyi nie zusim hibłaja. Piša Alaksandar Kłaskoŭski.
Łukašenka zrabiŭ mocny chod, abviaściŭšy vybary nazaŭtra paśla sustrečy z Pucinym. Jak zaznačyŭ adzin analityk, navat kali b jany prosta papili harbaty, heta ŭžo vyhladała b padtrymkaj z boku Kramla. A tut Alaksandar Ryhoravič jašče j tanny haz pryvioz! Mieniej za 47 dalaraŭ pry $230 dla pamarančavaj Ukrainy — heta nahladny ŭrok: nie hulajcie ŭ revalucyi!
Nu a čym moža pryvabić elektarat Milinkievič? U vypadku jahonaj pieramohi źnižak na błakitnaje paliva čakać nie vypadaje. Tym, chto arhanična nie prymaje ciapierašniaj systemy, dastatkova, što Milinkievič — alternatyva Łukašenku. Ale ž u mnohich nie nastolki trapiatkoje staŭleńnie da demakratyčnych kaštoŭnaściaŭ. Masu chvaluje prostaje, prahmatyčnaje pytańnie: jakimi piernikami adździačyć novy prezydent?
Jak adznačajuć analityki, vyraznaha pasłańnia, adrasavanaha šarahovaj publicy, u Milinkieviča nie było. A lubuju prahramu treba jašče j danieści. Prablema tut nia tolki ŭ liku vałantejoraŭ. Ci zdolejuć jany pieradać masie enerhietyku pasłańnia? Dziela hetaha treba najpierš samim ščyra vieryć u pieramieny.
Na tle pesymizmu mnohich mienavita ŭłada paradaksalnym čynam zaśviedčyła, što sprava apazycyi nie zusim hibłaja. Ssunuŭšy hałasavańnie na sakavik, kiraŭnictva dziaržavy pakazała, što, miakka kažučy, chvalujecca za vynik.
Vidavočna, tryvohu sparadzili źjaŭleńnie adzinaha kandydata i jahonyja vajažy pa krainie. To bok, abjadnaŭčyja vysiłki apazycyi dali plon.
Toje, što ciaham 2005 hodu lidery hałoŭnych apazycyjnych siłaŭ zdoleli zakiłzać ambicyi i vytrymać centra kansalidacyi, — nadzvyčaj kaštoŭna. Ale niedaravalna doŭha vybudoŭvali paśla kanhresu svaju «vertykal». Milinkievič pajšoŭ u narod biez vyraznaha mesydžu, biez atrybutyki. Pachvaliŭšy džynsavy varyjant, adziny kandydat zarabiŭ užo kpiny nakont pošuku śviežych idejaŭ u sekand-chendzie.
Ułada choča razhromnaha liku na tablo. Kab spraŭdzić tezu, što nieŭzabavie «i hetaj słaboj apazycyi ŭ nas nia budzie». Ale, prahnučy zabiaśpiečyć «elehantnuju pieramohu», viarchi mohuć i pierahnuć.
Aficyjnyja vyniki hałasavańnia zdolnyja aburyć elektarat tady, kali ŭ jaho budzie vostraje pačućcio padmanu. U 2001 hodzie naŭrad ci chto moh pavieryć, što de-fakta pieramoh Hančaryk. Ź inšaha boku, u Białhradzie, Kijevie ludziej šturchała na pratest mienavita pačućcie abražanaj hodnaści: nie damo skraści naš vybar!
Treba addać naležnaje: stratehi biełaruskaha režymu asensavali dośvied kalarovych revalucyjaŭ. Zadziejničany ceły arsenał preventyŭnych zachadaŭ, jaki viančajuć palityzavanyja naveli kryminalnaha zakanadaŭstva. A pieranos vybaraŭ adrazaje apazycyju ad značnaj častki resursaŭ.
Razam z tym, upieršyniu my nastolki vyrazna ŭbačyli, što ŭładny Halijaf nervujecca, a tamu zdolny na pamyłki. Nakolki zmoža skarystacca hetym apazycyjny Davyd?
Fota Andreja Lankieviča