Jakija braŭzery zaraz samyja papularnyja ŭ śviecie i ŭ Biełarusi: pieravahi, niedachopy i krychu historyi
U kancy XX stahodździa na rynak stali masava vychodzić piersanalnyja kampjutary roznych brendaŭ, a razam ź imi — i prahramnaje zabieśpiačeńnie. U 1990-ch pačałosia spabornictva za lidarstva na rynku prahram, praź jakija adbyvajecca ŭzajemadziejańnie ź internetam — braŭzeraŭ.
Doŭhi čas samym papularnym u śviecie braŭzeram byŭ Netscape Navigator. Źjaŭleńnie Internet Explorer ad Microsoft pakłała pačatak spabornictvu za lidarstva na rynku. U 1997 hodzie na viečarynie ŭ San-Francyska ŭ honar vypusku Internet Explorer 4.0 byŭ pradstaŭleny trochmietrovy łahatyp braŭzera. Na nastupnuju ranicu rabotniki Netscape, pryjšoŭšy na pracu, ubačyli hetuju kanstrukcyju na hazonie pierad svaim ofisam z zapiskaj «Ad kamandy IE. My lubim vas». Rabotniki pavalili hetuju instalacyju i ŭ adkaz raźmiaścili na joj postać svajho firmovaha piersanaža — dynazaŭra, prymacavaŭšy da jahonych łapak znak z nadpisam «Netscape 72, Microsoft 18», majučy na ŭvazie raźmierkavańnie dolaŭ rynku.
Tak pačałasia vajna braŭzeraŭ. Tady jašče nie viedali, što 72 adsotki mohuć imhnienna pieraŭtvarycca ŭ 0, a 0 — u 100.
Zaraz isnuje niekalki najbolš viadomych prahram dla dostupu ŭ internet, papularnaść jakich moža značna adroźnivacca ŭ roznych krainach. Zboram statystyki pa ich vykarystańniu zajmajecca irłandskaja kampanija StatCounter. My pahladzieli, jakija braŭzery lidzirujuć u śviecie i ŭ Biełarusi i vyłučyli ich pieravahi i niedachopy.
U śviecie
U śviecie karcina papularnaści braŭzeraŭ vyhladaje tak:
Zialony — Google Chrome, čyrvony — Opera, žoŭty — UC Browser, aranžavy — Mozilla Firefox, sini — Internet Explorer, čorny — Safari. Fota: Vikipiedyja.
UC Browser vielmi papularny ŭ Kitai i Indyi, nasielnictva jakich składaje 36% nasielnictva Ziamli, tamu hety braŭzier zajmaje vysokuju pazicyju ŭ rejtynhu. U Jeŭropie ž jon amal nieviadomy, tamu jaho my ŭ artykule razhladać nie budziem.
1. Google Chrome
Z momantu svajho źjaŭleńnia ŭ 2008 hodzie braŭzer ad kampanii Google zavajoŭvaŭ rynak niejmavierna vialikimi krokami. I tolki ŭ 2017 hodzie było zafiksavana nievialikaje padzieńnie. U čym ža pośpiech hetaha braŭzeru?
Hałoŭnaj inavacyjaj Google Chrome stała minimalizacyja interfiejsu: raspracoŭščyki vyrašyli, što najbolš važna skancentravać uvahu karystalnika na veb-staroncy, čym na roznych pryhožych knopkach i zakładkach braŭzera. Taksama svaju rolu adyhrała vialikaja biblijateka roznych veb-dadatkaŭ i pašyreńniaŭ.
Pieravahi
- Chutkaść. Pavodle šmatlikich testaŭ, Chrome zajmaje pieršaje miesca pa chutkaści pracy (zahruzki staronak) siarod usich papularnych braŭzeraŭ
- Biaśpiečnaść. Braŭzer maje ŭłasnuju bazu škodnasnych resursaŭ, jakaja rehularna abnaŭlajecca
- Režym «Inkohnita», jaki dazvalaje naviedvać lubyja sajty biez adlustravańnia ich u historyi
- Pašyreńni. Karysnyja dla tych, chto lubić rehularna mianiać temu afarmleńnia, dadavać roznyja płahiny z nadvorjem, navinami i h. d.
- Ubudavany pierakładčyk sajtaŭ
- Hałasavy pošuk
- Błakiroŭka rekłamy
Niedachopy
- Vialiki abjom zajmanaje apieratyŭnaje pamiaci
- Častaje zapavolvańnie pracy pry niekalkich adkrytych układkach
2. Safari
Hety braŭzer dastupny tolki karystalnikam apieracyjnaje sistemy macOS ad amierykanskaj kampanii Apple. Niekatory čas jon byŭ dastupny i dla Windows, ale zaraz prajekt zakryty.
Pieravahi
- Dobraja chutkaść pracy pry vialikaj kolkaści adkrytych układak
- Funkcyja pryvatnaha prahladu (anałah «Inkohnita» ŭ Chrome)
- Ubudavany błakiroŭščyk rekłamy
- Mahčymaść pieradprahladu staronak pa hipierspasyłkach na sajtach, nie adkryvajučy dadatkovych układak (staronka adkryvajecca ŭ maleńkim akiency)
- Mahčymaść tłumačeńnia značeńnia i pierakładu asobnych słovaŭ na veb-staronkach
- Zručnaje kiravańnie žestami
Niedachopy
- Vyklučny minimalizm. Dyzajn zanadta prosty — nie kožnamu spadabajecca
- Składanaść vykarystańnia dla navičkoŭ. Kali nie viedaješ, dzie schavanyja tyja ci inšyja funkcyi, pryjdziecca ich pašukać
3. Mozilla Firefox
Historyja hetaha braŭzera pačałasia ŭ 2002 hodzie. Tady jon pavolna, ale upeŭniena, pavialičvaŭ kolkaść svaich karystalnikaŭ, zavajavaŭšy ŭ 2009 treciuju častku rynka. U nastupnym, 2010-m, hodzie pačaŭsia praces imklivaha źnižeńnia aŭdytoryi braŭzera, i zaraz, nie hledziačy na šerah pryniatych mier pa jaho madernizacyi, im karystajucca, pavodle roznych acenak, ad 5 da 10 adsotkaŭ aŭdytoryi interneta.
U 2008 hodzie Firefox ustalavaŭ rekord pa kolkaści zapampoŭvańniaŭ prahramy — 8 miljonaŭ za sutki. Jon byŭ zaniesieny ŭ Knihu rekordaŭ Hinesa.
Pieravahi
- Stabilnaść pracy. Pavodle daśledavańnia amierykanskaje kampanii Sauce Labs, u 2014 hodzie u Firefox pamyłki ŭźnikali radziej, čym u inšych braŭzerach. Stabilnaść pracy — admietnaja rysa braŭzera i zaraz
- Vialikaja biblijateka pašyreńniaŭ (hł. niedachopy)
Niedachopy
- Chutkaść pracy davoli nizkaja, ale z apošnimi abnaŭleńniami situacyja palapšajecca
- Chutkaść pracy rezka źmianšajecca pry ŭstalavańni niekalkich pašyreńniaŭ (płahinaŭ)
4. Opera
Niahledziačy na toje, što ŭ śviecie hety braŭzer vykarystoŭvaje ŭsiaho 4% internet-aŭdytoryi, u Biełarusi hety pakazčyk składaje amal 17%!
Pieravahi
- Chutkaść. «Opiera» maje funkcyju Turbo, jakaja dazvalaje značna pavialičyć chutkaść zahruzki sajtaŭ. Akramia hetaha Opiera vydatna aptymizavanaja dla pracy na kampjutarach sa słabymi techničnymi charaktarystykami
- Ubudavany VPN. Možna karystacca zabłakavanymi ŭ luboj krainie sajtami biez vykarystańnia ananimajzieraŭ
- Infarmatyŭnaść. Braŭzer adlustroŭvaje roznyja znački, jakija paviedamlajuć stan staronki, a taksama dziejańni, jakija adbyvajucca pa-za ŭvahaj karystalnika
- Ubudavany błakiroŭščyk rekłamy
- Režym ekanomii enierhii
Niedachopy
- Biaśpieka. Pa vynikach niekatorych testaŭ i daśledavańniaŭ braŭzer «Opiera» nie źjaŭlajecca vielmi biaśpiečnym, bo časta jon nie bačyć patencyjna niebiaśpiečnyja sajty
- Davoli vialiki abjom zajmanaje apieratyŭnaje pamiaci
5. Internet Explorer i Microsoft Edge
Jakimi krokami Google Chrome zavajoŭvaŭ luboŭ karystalnikaŭ, takimi ž standartny braŭzer Windows — Internet Explorer — jaje hublaŭ: u siaredzinie 2008 hoda hety braŭzer zajmaŭ, pavodle roznych źviestak, da 70% rynku, a ciapier hetaja ličba apuściłasia da 3%.
U 2015 na źmienu Internet Explorer pryjšoŭ Microsoft Edge. Jon zaraz zajmaje prykładna tuju ž dolu rynka, što i papiarednik, jakim niekatoryja ŭsio jašče karystajucca. Ale pakolki Internet Explorer nie źjaŭlajecca aktualnym braŭzeram, razhledzim pieravahi i niedachopy tolki Microsoft Edge.
Pieravahi
- Dyzajn vykanany ŭ ahulnym styli z apieracyjnaj sistemaj
- Biaśpieka. Internet Explorer ličyŭsia adnym z najbolš biaśpiečnych braŭzeraŭ i pieradaŭ hetuju ŭłaścivaść spadkajemcu
- Hałasavy pošuk
- Natatki. Možna vydzialać tekst žoŭtym virtualnym markieram, rabić nadpisy i zachoŭvać usio heta
Niedachopy
- Nie vielmi vysokaja chutkaść pracy
- Časam niekarektnaje adlustravańnie niekatorych starych sajtaŭ, bo braŭzer novy
- Adsutnaść piersanalizacyi — amal niemahčyma nastroić braŭzer pa ŭłasnym huście
Jakimi braŭzerami karystajucca biełarusy?
Pavodle StatCounter, doli braŭzeraŭ na rynku Biełarusi raźmierkavanyja nastupnym čynam:
Jak bačna z hrafika nižej, suśvietnaj karcinie padzieńnia Internet Explorer i rostu papularnaści Google Chrome u Biełarusi adpaviadaje karcina padzieńnia Opera i rostu Google Chrome.
Taksama krychu mienš za 5% biełarusaŭ karystajucca braŭzeram rasijskaj kampanii «Jandeks», jaki byŭ stvorany ŭ 2012 hodzie na bazie Chromium, jak i Google Chrome. U čym jaho asablivaści?
Jak i «Chrom», «Jandeks.Braŭzer» maje funkcyju aŭtamatyzavanaha pierakładu staronak z roznych movaŭ, padtrymlivaje roznyja pašyreńni i šmatlikija žesty myšy. Niekatoryja karystalniki ŭ internecie skardziacca, što jon zajmaje šmat apieratyŭnaje pamiaci, zapavolvajučy pracu kampjutara pry niekalkich adkrytych układkach.
A jakim braŭzeram karystajeciesia vy?