«Kab syn ź dziacinstva razumieŭ, jakoje ŭ nas žyćcio» — Ksiuša i Arciom z NaviBand raskazali, jak razam z naradžeńniem Macieja prajšli praz kryzis
Praciahvajem cykł pra važnyja, simvaličnyja rečy z žyćcia roznych biełarusaŭ. Siońnia my paprasili raspavieści pra svaju abranuju piaciorku Ksiušu Žuk z NaviBand.
Razam ź joj, mužam, muzyčnym partnioram i kaleham Arciomam Łukjanienkam, i ich synam Maciejem sustrakajemsia ŭ Łošyckim parku.
Ksiuša, Arciom i Maciej.
Papaŭnieńnie ŭ ich tvorčaj siamji zdaryłasia 1 maja. Macieju miesiac ź nievialikim, ale jon užo maje pašpart i vizu, kab u chutkim časie adpravicca na hastroli ŭ Polšču i Hałandyju, braŭ udzieł u zapisie novaj pieśni «Maładość u kišeni» i navat 17 hadzin zapar znachodziŭsia razam z maci muzykaŭ pa-za kadram, pakul zdymaŭsia klip na jaje. Dobra što, śpievy baćkoŭ i rok-muzyka, što pastajanna hučyć u domie, dla Macieja pakul — najlepšyja kałychanki.
«Nam važna, kab syn ź dziacinstva razumieŭ, jakoje ŭ nas žyćcio, što my budziem jeździć pa hastrolach, kab jon pryzvyčaiŭsia da hetaha rytmu», — kaža Ksiuša.
Jaje maleńkuju baćki-akciory, jakija hrali ŭ amatarskim teatry «Žyvoje słova», taksama pastajanna «ciahali» z saboj. Siońnia maci Natalla dapamahaje maładym baćkam, pakul jany pracujuć na scenie. Pajedzie jana razam ź imi i na hastroli.
Praŭda, da siońniašniaj lohkaści ŭsprymańnia novaha statusu pryjšłosia pryjści. Ksiuša i Arciom pryznajucca, što na apošni miesiac ciažarnaści vypaŭ svojeasablivy tvorčy kryzis, kali razam ź niemahčymaściu vystupać, što cisnuła, na hałavu sypalisia roznyja nialohkija pytańni:
«My zhadvali, što ŭžo paśpieli zrabić, pajezdku na Jeŭrabačańnie, udzieł u rekłamnych kampanijach i dumali, kudy ruchacca dalej. Paśla pasprabavali adpuścić siabie, pierastać napružvacca i adkazy na pytańni znajšlisia sami saboj. Ciapier u nas novy tvorčy etap», — raskazvaje Arciom. Navat paśla miesiaca adpačynku ad aktyŭnych vystupaŭ jany «zaskuholili» i ź nieciarplivaściu viartalisia ŭ stroj. «Muzyka — heta sapraŭdny narkotyk», — kaža Ksiuša.
Siońnia muzyki całkam zabiaśpiečvajuć tvorčaściu svajo žyćcio i radujucca, što ŭ imia finansavaj stabilnaści bolš nie treba marnavać siły na vykanańnie kavieraŭ ci iści na dadatkovuju pracu. Ale im chočacca «novych viaršyń i aŭdytoryj». Mienavita tamu ŭdzielniki NaviBand płanujuć bolš vystupać za miažoj.
A ciapier pra rečy.
Amierykanski pałaroid «Impuls»
Hety pałaroid — pryvitańnie z 90-ch hadoŭ — siabry padaryli nam z Arciomam na viasielle. Jon dazvalaje rabić tolki 8 fotazdymkaŭ, a kasiety dla jaho ŭ Biełarusi nie dastać, tamu my vielmi bieražliva ich raschodujem. Fiksujem tolki samyja značnyja momanty z žyćcia.
Adzin ź ich jakraz z našaha viasiella. Na pałaroid taksama byŭ zrobleny pieršy zdymak Macieja i zachavany na pamiać hod ź jaho naradžeńnia.
Kadr ź viasiella maładych.
Ja vykładaju niejkija fotazdymki z synam u instahram, ale spadziajusia, što maja staronka nie pieratvorycca ŭ mamski błoh, ja b hetaha nie chacieła.
Zdymak UHD
A hety zdymak dla mianie taksama vielmi važny: tut synu kala 20 tydniaŭ. My chutka daviedalisia pra poł dziciaci, chacia papiarednie spračalisia, ci treba nam heta. Moža, lepš daznacca, chłopčyk heta ci dziaŭčynka adrazu ŭ radzilni? Ale ŭ vyniku vyrašyli nie rabić dla siabie z hetaha sakret.
My nie płanavali dzicia metanakiravana. My vierym, što ŭsio asablivaje prychodzić u naša žyćcio niezdarma: i pieśni, i dzieci.
Kali ja zaciažaryła, maja babula ŭsio chvalavałasia, raiła: «Nadziavaj na siabie što-niebudź abjomnaje, kab nie bačna było žyvata». Ale chavacca było niemahčyma: usio ž my pastajanna navidavoku na kancertach. Navat kali ŭ mianie jašče byŭ nie bačny žyvot, ale ŭžo pavialičylisia ščoki, niekatoryja pačali pytacca, ci nie ciažarnaja ja. My doŭha dumali, jak možna pryhoža raspavieści pra toje, jakija źmieny ŭ nas adbyvajucca. I tady ŭ chłopcaŭ uźnikła ideja ŭklučyć hety namiok u klip «A dzie žyvieš ty?», chacia tam užo byŭ hatovy krychu inšy scenaryj.
Prahrama da śpiektakla Jaŭhiena Hryškaŭca
Da śpiektakla «Vahi» my z Arciomam napisali muzyku. I tak stałasia, što my bačyli jaho ažno try razy zapar na scenie teatra MMAT. Jon vielmi viasioły: pra toje, jaje mužčyny čakać svaich žonak, jakija naradžajuć, u radzilni.
Ale Jaŭhien dla nas nie prosta čałaviek, ź jakim my supracoŭničajem. Možna skazać, što my siabrujem, aktyŭna pierapisvajemsia: dasyłajem adzin adnamu fotazdymki z adpačynkaŭ, dzielimsia tvorčaściu. Tak, jon adnym ź pieršych pasłuchaŭ našu pieśniu «Maładość u kišeni», jamu vielmi spadabałasia.
Siamiejny piarścionak
Hety piarścionak z zołata i rubinu na 18-hodździe mnie ŭručyła babula Nadzieja. Jon — siamiejnaja relikvija, jakuju, tak skłałasia, pieradajuć z pakaleńnia ŭ pakaleńnie. Majoj babuli ŭ svoj čas jaho addała jaje maci.
Piarścionak dla mianie vielmi darahi, tamu ja amal jaho nie našu, jak i ŭ cełym upryhožvańni. Sprava ŭ tym, što ja ich vielmi časta hublaju. Zaručalny piarścionak z dyjamientam, ź jakim Arciom rabiŭ prapanovu, i toj zhubiła.
Babcia «Padymi ručki»
Taki abiareh mnie padaravaŭ Aleh Chamienka. Jon nam niby dziadzia, jaki zaŭsiody padtrymlivaje, sočyć za našym raźvićciom, pieražyvaje.
Hetaja babcia nahadvaje, što treba ściskać zuby i iści napierad. Jana padniała ruki i nibyta zaklikaje: «Hej, davaj pracuj, napierad!». Ja zaŭsiody našu jaje z saboj, pierakładaju z adnoj torby ŭ inšuju, tamu jana ŭžo krychu brudnaja.
Babcia była sa mnoj navat na scenie padčas vystupu na Jeŭrabačańni. U biełaj sukiency zzadu miełasia dźvie kišeni: u adnoj lažała karobačka ad mikrafonu, a ŭ druhoj — hety, badaj što adzin z maich niešmatlikich, talisman.