Pamior Kłod Łancman
Jaho prodki pachodzili ź Vilejki.
Wikimedia Commons
U Francyi va ŭzroście 92-ch hadoŭ pamior režysior i piśmieńnik Kłod Łancman, aŭtar adnaho z samych znakamitych dakumientalnych filmaŭ pra Chałakost — «Šoa» («Katastrofa»).
Kłod Łancman źviazany karaniami ź Biełaruśsiu. Jahonyja habrejskija prodki pa baćkoŭskaj linii emihravali ŭ Francyju na pačatku 20 stahodździa ź Vilejki, pa maciarynskaj linii — z Kišyniova. U hady Druhoj suśvietnaj vajny jon byŭ udzielnikam Ruchu supracivu. U nastupnyja dziesiacihodździ byŭ publicystam i vykładčykam fiłasofii, a ŭ 70-ja hady zaniaŭsia dakumientalnym kino.
Film «Šoa» jon zdymaŭ bolš za 10 hadoŭ, na ekrany jon vyjšaŭ u 1985 hodzie i atrymaŭ suśvietnuju viadomaść. Film idzie amal dzieviać hadzin i składajecca sa śviedčańniaŭ ludziej, jakija pieražyli Chałakost, a taksama byłych nacystaŭ. Temie Chałakostu pryśviečany i šerah nastupnych jaho filmaŭ — pra nacysckija łahiery śmierci. Łancman praciahvaŭ zdymać kino da apošnich hadoŭ, letaś jon pradstaviŭ na kanskim kinafiestyvali film «Napałm».