Paplečnik «Havary Praŭdu» piša zajavy ŭ milicyju na niezaležnych błohieraŭ
Žychar Rečycy Dzianis Ściepanienka jašče niadaŭna bałatavaŭsia ŭ deputaty miascovych savietaŭ pry padtrymcy «Havary Praŭdu». A ciapier jon piša zajavy ŭ milicyju, kab niezaležnyja supołki ŭ sacyjalnych sietkach pakarali jak maha chutčej.
fota vk.com
Pieršym uvahu na heta źviarnuŭ błohier Eduard Palčys. Jon paviedamiŭ, što Ściepanienka źviarnuŭsia ŭ milicyju, kab pravieryli supołku Ukantakcie «Rečyca biez cenzury». Pa słovach błohiera, abureńnie Ściepanienki vyklikaŭ post, jaki pierakazvaŭ artykuł Palčysa, u jakim pravodziacca anałohii z Ukrainaj i vykazvajucca dumki, što musić adbyvacca ŭ hramadstvie, kab «zrynuć złačynny režym».
A kali milicyja nijakaha złačynstva ŭ dziejnaści supołki nie znajšła, to Ściepanienka pajšoŭ u KDB i prakuraturu. Tam jon užo napisaŭ zajavy na milicyjantaŭ.
Sam Ściepanienka havaryć na hetuju temu nie zachacieŭ.
«Ja kamientavać ničoha nie budu pakul, moža, paźniej», — adkazaŭ jon «Našaj Nivie».
Adnak uskosna paćvierdziŭ, što paskardziŭsia na milicyjantaŭ ŭ inšyja struktury. Pakul što pravodziacca pravierki.
Pa słovach Ściepanienki, adna z pryčyn, čamu jon pajšoŭ milicyju, — abrazy, jakija źjaŭlajucca ŭ supołcy «Rečyca biez cenzury».
«U dačynieńni da mianie tam pastajanna chłuśnia, paklop, abrazy, raspaŭsiudžvajecca niepraŭdzivaja infarmacyja, jakaja hańbić mianie. I heta stała pryčynaj napisańnia zajavy», — patłumačyŭ jon.
Darečy, pošuk pa zapisach supołki pakazvaje, što Ściepanienku tam, miakka kažučy, nie vielmi lubiać.
A što z dopisam, u jakim pierakazvaŭsia artykuł Palčysa? Paśla jaho aktyvist sapraŭdy pajšoŭ u milicyju?
Ściepanienka pryznaje, što zajavu napisaŭ, bo niešta ŭ tym dopisie jaho aburyła. A što kankretna — nie pamiataje.
«Ja nie pamiataju, što ja pisaŭ. Ja napisaŭ i zabyŭsia, chaj praviarajuć, što chočuć, toje i robiać», - adkazaŭ jon.
Praŭda, «Havary Praŭdu» užo adchryściłasia ad Ściepanienki. Andrej Dźmitryjeŭ paviedamiŭ, što ŭ arhanizacyi fiksavanaje členstva — kandydaty pišuć zajavy, i ich asoby razhladajucca. Ściepanienka členam «Havary praŭdu» nikoli nie byŭ, zapeŭniŭ Dźmitryjeŭ, maŭlaŭ, prosta dapamahaŭ arhanizacyi.
«Što tyčycca vybaraŭ u miascovyja saviety. Jon išoŭ pry padtrymcy «Havary praŭdu». Heta było palityčnaje rašeńnie — my stavili pierad saboj zadaču ŭciahnuć u palityčnuju pracu jak maha bolš hramadzian, jakija padzialajuć stratehiju mirnych pieramienaŭ. Častka z tych, chto išoŭ na vybary pry našaj padtrymcy, nie byli siabrami HP i nie stali imi paśla. My razumieli ryzyki, ź jakimi źviazana takoje rašeńnie. I pajšli na ich śviadoma», — napisaŭ Dźmitryjeŭ u fejsbuku.