Biełaruskaja apazicyja paskardziłasia ŭ Bruseli na drakonaŭskija sumy apłat za arhanizacyju masavych akcyj
Fota Siarhieja Hudzilina
Delehacyja biełaruskich apazicyjnych palitykaŭ udzielničaje ŭ forumie «Jeŭraniesta» ŭ Bruseli, piša Radyjo Svaboda.
Jak paviedamiŭ adzin ź lideraŭ chryścijanskich demakrataŭ Vital Rymašeŭski, biełaruskija apazicyjaniery pašyryli tezy svaich vystupaŭ u suviazi z novym paradkam apłaty za «pasłuhi» milicyi, miedykaŭ i ŽKH, jakaja kładziecca pastanovaj urada Biełarusi na zajaŭnikaŭ masavych akcyj.
«Da budučaha suda nad hałoŭnaj redaktarkaj partału tut.by Marynaj Zołatavaj, da novych atak na chryścijanskija carkvy, da inšych prykładaŭ parušeńnia pravoŭ čałavieka dadałasia drakonaŭskaja pastanova ŭrada ab hrašovych vydatkach na masavyja akcyi. My budziem tłumačyć našym partnieram, što novyja ŭmovy praviadzieńnia pikietaŭ i mitynhaŭ robiać ich faktyčna niemahčymymi», — skazaŭ Vital Rymašeŭski.
U Bruseli razam z Rymašeŭskim znachodziacca Iryna Vieštard, Juraś Hubarevič, Siarhiej Kalakin, Hanna Kanapackaja, Anatol Labiedźka.
Nahadajem, što za pasłuhi milicyi, miedykaŭ i dvornikaŭ arhanizatary akcyj i raniej musili płacić, ale kolki kankretna — vyznačali miascovyja ŭłady. Ciapier staŭki vyznačyŭ urad.
Za achovu hramadskaha paradku arhanizatar musić zapłacić:
- 76,5 rubla — kali ŭ akcyi biaruć udzieł da 10 čałaviek;
- 637,5 rubla — ad 11 da 100 čałaviek;
- 3825 rubloŭ — ad 101 da 1000 čałaviek;
- 6375 rubloŭ — bolš za 1000 čałaviek.
Kali akcyja pravodzicca ŭ miescy, nie adniesienym miascovymi ŭładami da pastajannych miescaŭ praviadzieńnia masavych mierapryjemstvaŭ, nazvanuju sumu treba pamnožyć na 1,5.