Sudziać studenta-azierbajdžanca. Jon zładziŭ masavuju bojku praź dziaŭčynu, usio skončyłasia zabojstvam
Rustam Achmiedaha ahły Rachimaŭ — student druhoha kursa minskaj Akademii avijacyi. 12 listapada jon ź siabrami sustreŭsia z 21-hadovym ślesaram Alaksiejem Kryvašejem. Była bojka, i, pavodle śledstva, Rachimaŭ zarezaŭ Kryvašeja.
Rustam Rachimaŭ. Fota Paliny Zabieła
Nahodaj dla sustrečy chłopcaŭ stała dziaŭčyna: Alaksiej pačaŭ sustrakacca z 18-hadovaj studentkaj avijacyjnaj akademii. Raniej jana była dziaŭčynaj Rustama, i pačućci ŭ taho jašče nie astyli: Rachimaŭ pisaŭ dziaŭčynie, zvaniŭ, pahražaŭ. Kryvašej sustrakaŭsia ź im, kab pahavaryć, ale karyści toje nie dało.
Alaksiej Kryvašej
12 listapada 2018 hoda chłopcy sustrelisia jašče raz, kab vyśvietlić adnosiny. Kožny ŭziaŭ z saboju siabroŭ. Alaksiej — dvaich, Rustam, jak kazali, čałaviek vosiem. Kryvašej nie bajaŭsia sustrečy, tym bolš što raniej słužyŭ u PDV. Ale ž zdaryłasia bojka, padčas jakoj Rachimaŭ udaryŭ Kryvašeja nažom u žyvot.
Paciarpiełaha dastavili ŭ balnicu, ale vyratavać nie zmahli. Alaksiej pamior.
Rachimava znajšli i ŭziali pad vartu. 13 červienia ŭ sudzie Zavadskoha rajona pačaŭsia praces pa spravie. Rustama abvinavačvajuć u zabojstvie, jamu pahražaje ad 6 da 15 hadoŭ.
Baćki Rachimava na praces pryjechać nie zmahli. Panazirać za pracesam pryjšoŭ pradstaŭnik azierbajdžanskaha pasolstva: pieršy sakratar Džavid Ibajeŭ.
Na pačatku pasiadžeńnia Rustam paprasiŭ pierakładčyka. Sudździa Aleh Kalada pahadziŭsia, kab jon ŭdzielničaŭ u pracesie.
Fota Paliny Zabieła
Sam Rustam niabłaha razmaŭlaje pa-rusku, ale materyjały spravy jamu na ŭsiaki vypadak dublavaŭ pierakładčyk.
Pradstaŭnica rajonnaj prakuratury Maryna Łapavuchava začytała abvinavačvańnie: Rachimaŭ byŭ pjany i mieŭ namier zabić Alaksieja Kryvašeja. Padčas bojki Rustam udaryŭ jaho nažom «u vobłaść žyvata źleva». Heta i stała pryčynaj śmierci chłopca.
Rachimaŭ vinu nie pryznaŭ.
Fota Paliny Zabieła