Ź Biełarusi ŭ Litvu pierasielać paŭsotni ptušaniat viartlavaj čaracianki
Z terytoryi respublikanskaha łandšaftnaha zakaźnika «Zvaniec» u litoŭski reziervat «Žuvintas» pierasielać 50 ptušaniat viartlavaj čaracianki, paviedamili BiełTA mieniedžary prajekta PRAAN-HEF «Vietłands».
Mierapryjemstva pa kiravańni papulacyjami viartlavaj čaracianki realizujecca pa prahramie Life, jakaja finansujecca Jeŭrapiejskim sajuzam. Transłakacyja (pierasialeńnie) ptušaniat hetaha vidu ź biełaruskaha bałota «Zvaniec» u litoŭski reziervat «Žuvintas» dla zachavańnia suśvietnaj papulacyi viartlavaj čaracianki - adzin z vynikaŭ sumiesnaj dziejnaści prajekta «Stvareńnie sietki klučavych miescapražyvańniaŭ dla zabieśpiačeńnia doŭhaterminovaha spryjalnaha achoŭnaha statusu viartlavaj čaracianki ŭ Litvie» i prajekta «Vietłands».
Biełaruskaja ekśpiedycyja arnitołahaŭ i vałancioraŭ prybyła ŭ «Zvaniec» 29 maja. U zadačy hrupy ŭvachodzili pošuk na bałocie hniozdaŭ viartlavaj čaracianki, uziaćcie ptušaniat i ich utrymańnie da pieravozki. «Heta vielmi karpatlivaja rabota. Byvaje, na pošuki adnaho hniazda moža spatrebicca ceły dzień. Ptušaniat biaruć zusim maleńkimi - va ŭzroście 6-8 dzion z masaj kala 8 h. Praz kožnyja 10-12 chvilin ich treba karmić. Charčujucca jany nasiakomymi, adłoŭ jakich taksama ŭvachodzić u našy abaviazki», - raskazaŭ dyrektar zakaźnika Vital Škapič.
Čakajecca, što na novaje miesca žycharstva padrosłyja ptušaniaty viartlavaj čaracianki adpraviacca ŭžo siońnia. Biełaruskija vučonyja pieradaduć ptušak litoŭskim kaleham, jakija prybyli napiaredadni ŭ zakaźnik. Na ŭsich 50 ptušaniat aformleny śpiecyjalnyja «zahranpašparty» (nieabchodnyja mytnyja dakumienty). U lipieni kaardynatary prajekta «Vietłands» płanujuć pajezdku ŭ reziervat «Žuvintas», dzie budzie prachodzić nastupny etap transłakacyi: pieravod ptušak u avijaryi, kalcavańnie, dalejšy vypusk u dzikuju pryrodu.