Švied rassakreciŭ svaju rolu ŭ spravie Kazulina
Namieśnik kiraŭnika kamiteta parłamienta pa źniešnich suviaziach Urban Alin vykonvaŭ rolu pasiarednika pamiž uradami Biełarusi i ZŠA.
Šviedski deputat, namieśnik kiraŭnika kamiteta parłamienta pa źniešnich suviaziach Urban Alin vykonvaŭ rolu pasiarednika pamiž uradami Biełarusi i ZŠAŭ spravie vyzvaleńnia byłoha palitźniavolenaha Alaksandra Kazulina. Takaja infarmacyja pastupiła ŭ šviedskija ŚMI 15 lutaha.
U intervju BiełaPAN U.Alin paviedamiŭ, što ŭ «sakaviku‑krasaviku 2008 hoda» da jaho źviarnułasia dziaržsakratar ZŠA Kandaliza Rajs. Adnosiny pamiž Minskam i Vašynhtonam tady «znachodzilisia na miažy razryvu», i kiraŭnik źniešniepalityčnaha viedamstva ZŠA vyrašyła zrabić «apošniuju sprobu naładzić adnosiny, kab nie zakryvać amierykanskuju dypmisiju ŭ Biełarusi», zaznačyŭ jon.
U toj čas na pasadu namieśnika pamočnika dziaržsakratara pa Biełarusi, Małdovie i Rasii byŭ pryznačany Devid Mierkieł, ź jakim šviedskaha parłamientaryja źviazvaje daŭniaje siabroŭstva. D.Mierkieł rekamiendavaŭ amierykanskamu ŭradu U.Alina, biełaruski bok i ES taksama pryniali jaho kandydaturu. «Ja zhadziŭsia tamu, što byŭ zacikaŭleny, kab adnosiny pamiž Biełaruśsiu i ZŠA, pamiž Biełaruśsiu i ES naładzilisia. Ja — za dyjałoh», — zajaviŭ šviedski palityk.
U.Alin paviedamiŭ, što jaho pasrednictva nie zvodziłasia tolki da vyzvaleńnia A.Kazulina.Razmova išła pra naładžvańnie adnosinaŭ pamiž krainami i ŭmovy admieny ekanamičnych sankcyj z boku ZŠA, rastłumačeńnie pazicyj kožnaha z bakoŭ. Šviedski deputat zaznačyŭ, što lataŭ na «pieramovy i abmierkavańni» ŭ Vašynhton i Minsk. Pry hetym jon admoviŭsia raskryć svaje kantakty ź biełaruskaha boku. U ZŠA palityk kansultavaŭsia z K.Rajs, D.Mierkiełam i namieśnikam dziaržsakratara pa krainach Jeŭropy i Jeŭrazii Deniełam Frydam.
Pry hetym
U.Alin zaklikaŭ «nie pieraaceńvać» jaho rolu, bo ŭ pieramovach udzielničała «šmat bakoŭ i ludziej».Sakretnaść svajoj misii jon rastłumačyŭ «tonkaściu» temaŭ, što abmiarkoŭvalisia. U pryvatnaści A.Kazulin, ź jakim šviedski palityk znajomy asabista, nie viedaŭ pra jaho misiju.
«Ja vielmi rady, što biełaruska‑amierykanskija i biełaruska‑ieŭrapiejskija adnosiny pačali naładžvacca, ale jany mohuć być jašče lepšymi», — zaznačyŭ U.Alin. Deputat vykazaŭ hatoŭnaść vystupić u jakaści pasrednika «ŭ budučym, kali takaja budzie cikavaść z boku partnioraŭ».
Jak skazaŭ BiełaPAN pradziusier biełaruskaj prahramy radyjo «Šviecyja» Dźmitryj Płaks, U.Alin — člen sacyjał‑demakratyčnaj partyi, z 90‑ch hadoŭ minułaha stahodździa zajmajecca Biełaruśsiu, kantaktuje z sacyjał‑demakratyčnymi partyjami krainy. Jon viadomy ŭ Šviecyi palityk. Pavodle infarmacyi šviedskaj presy, kiraŭnik MZS Šviecyi padtrymaŭ kandydaturu U.Alina. Kamandziroŭki deputata apłačvała jaho partyja.
Nahadajem, A.Kazulin byŭ vyzvaleny z kałonii «Vićba‑3» 16 žniŭnia 2008 hoda na padstavie ukaza prezidenta ab pamiłavańni. 21 žniŭnia ŭ Minsk z rabočym vizitam prylataŭ D.Mierkieł. 4 vieraśnia Ministerstva finansaŭ ZŠA prypyniła na šeść miesiacaŭ sankcyi suprać pradpryjemstvaŭ «Łakafarba» i «Škłovałakno». Raniej jany byli ŭviedzieny ŭ dapaŭnieńnie da ekanamičnych sankcyj u dačynieńni da kancerna «Biełnaftachim».