«Prafiesijnych raźviedčykaŭ u majoj kamandzie niama». Novy pasoł Rasii pačynaje vučyć biełaruskuju movu
U kułuarach «Minskaha dyjałoha» karespandent «Našaj Nivy» pahavaryŭ z novym pasłom Rasii Dźmitryjem Mieziencavym, jaki pryjechaŭ siudy na miesca vystaŭlenaha Michaiła Babiča.
Dźmitryj Mieziencaŭ, fota Nadziei Bužan
«Naša Niva»: Vy robicie ŭražańnie čałavieka, čyj biełaruski etap karjery nie skončycca hetak ža imkliva, jak i papiarednika. Moža być, vy ŭžo i biełaruskuju movu pačali vyvučać?
Dźmitryj Mieziencaŭ: Voś vam maja vizitoŭka, aformlenaja pa-biełarusku. Ci šmat vy viedajecie pasłoŭ u Biełarusi, jakija zrabili takija vizitoŭki?
Ja ŭžo zapytaŭ padtrymki ŭ pošuku piedahoha, jaki b daŭ mnie nu jakich siem urokaŭ biełaruskaj movy, kab zrazumieć jaje łohiku i strukturu.
Tym bolš ja doŭha pracavaŭ u druku, ź vialikim zadavalnieńniem čytaju ruskuju litaraturu, mnie było b cikava paraŭnać, čym našyja movy blizkija. Dastatkova litaratury vychodzić na biełaruskaj movie. Tamu ja b chacieŭ jaje zrazumieć i prajavić pavahu da adnoj z tych movaŭ, na jakich havorać biełarusy.
«Naša Niva»: A chto vaš lubimy biełaruski piśmieńnik?
Dźmitryj Mieziencaŭ: Niadaŭna byli dni duchoŭnaj kultury Rasii ŭ Biełarusi, i dyrektar litaraturnaha muzieja z Maskvy bliskuča čytaŭ Piatrusia Broŭku pa-biełarusku, navat biez tekstu pierad vačyma! Voś… [Broŭku mahu nazvać].
Nu i što datyčyć absalutnaha maštabu litaraturnaha podźviha Vasila Bykava, to tut dla ŭsich hramadzian, chto sutykaŭsia ź jaho tvorami, uražańnie zastajecca nazaŭsiody.
«Naša Niva»: Minsk pakidajuć kadry, jakich braŭ na rabotu Michaił Babič. Składvajecca ŭražańnie, što vy ad ich pazbaŭlajeciesia. Uražańnie słušnaje?
Dźmitryj Mieziencaŭ: Što takoje kadry Babiča? Idzie płanavaja zamiena dypłamataŭ, jakija pracavali pry Babičy, pryjazdžajuć novyja. Kaniečnie, častku kaleh, ź jakimi ja pracavaŭ raniej, u tym liku ŭ Piekinie, ja prapanavaŭ u Minsk — kadravaja słužba MZS prapanovy padtrymała. Tut niama supraćstajańnia adnych kadraŭ druhim. Treba, kab kalektyŭ u pasolstvie byŭ prafiesijny, zbałansavany, kab była tavaryskaja atmaśfiera.
«Naša Niva»: Novyja kadry taksama buduć prafiesijnymi raźviedčykami, jak i ŭ Babiča?
Dźmitryj Mieziencaŭ: U mianie niama nivodnaha prafiesijnaha raźviedčyka!