Milinkievič i ŭdava Bykava ŭ Viciebsku
U Viciebsku 18 červienia adbyłosia ahulnaharadzkoje litaraturnaje śviata, prymierkavanaje da 82-j hadaviny z dnia naradžeńnia Vasila Bykava.
U Viciebsku 18 červienia adbyłosia ahulnaharadzkoje litaraturnaje śviata, prymierkavanaje da 82-j hadaviny z dnia naradžeńnia Vasila Bykava. Sankcyjavanaje ŭładami mierapryjemstva prajšło ŭ centralnym parku kultury i adpačynku «Mazuryna» ź inicyjatyvy abłasnoj arhanizacyi Tavarystva biełaruskaj movy. Ušanavać pamiać piśmieńnika pryjšli kala 500 žycharoŭ horadu.
Śviata pačałosia z vystupu aktoraŭ Nacyjanalnaha akademičnaha dramatyčnaha teatru imia Jakuba Kołasa, jakija syhrali ŭryvak z spektaklu «Streł u tumanie» pa matyvach adnajmiennaha tvoru Bykava ŭ pastanoŭcy Michała Krasnabajeva. Zatym vystupili viadomyja litaratary: staršynia Sajuzu biełaruskich piśmieńnikaŭ (SBP) Aleś Paškievič, namieśnik staršyni SBP Anatol Kudraviec, paety Anatol Viarcinski, Siarhiej Zakońnikaŭ, Uładzimier Niaklajeŭ, redaktar časopisu «Dziejasłoŭ» Barys Piatrovič.
Ułasnyja tvory, pryśviečanyja Bykavu, pračytali viciebskija litaratary, z katorymi prysutnych paznajomiŭ staršynia abłasnoj arhanizacyi SBP Franc Siŭko. Pad vopleski hledačoŭ A.Paškievič uručyŭ bilet siabra SBP viciebskaj paetcy Ludmile Simanionak, jakaja niadaŭna ŭstupiła ŭ šerahi hetaj piśmieńnickaj arhanizacyi.
Alaksandar Milinkievič siarod słuchačoŭ
Na śviacie prysutničała ŭdava V.Bykava Iryna i lider demakratyčnych siłaŭ Biełarusi Alaksandar Milinkievič. Žonka piśmieńnika sa ślaźmi na vačoch padziačyła žycharam Viciebsku za ciopły pryjom i pamiać. A.Milinkievič adznačyŭ, što «asoba Bykava – apostalskaja dla biełaruskaj historyi» i što «mienavita ad takich vydatnych ludziej idzie chvala pazbaŭleńnia ad strachu i pačynajecca šlach da svabody».
Havoryć Iryna Bykava.
Pad huki himnu «Mahutny Boža» prysutnyja ŭstali, byli ŭźniatyja 12 bieł-čyrvona-biełych ściahoŭ. Śviata skončyłasia vystupami barda Viktara Šałkieviča i ŭručeńniem biełaruskich knižak pieramožcam litaraturnaj viktaryny, pryśviečanaj žyćciovamu i tvorčamu šlachu V.Bykava.
Pad huki himnu «Mahutny Boža» moładź uźniała ściahi.
Niahledziačy na toje, što mierapryjemstva było dazvolena harvykankamam, supracoŭniki milicyi praviarali sumki šmat u kaho, chto išoŭ na śviata ŭ park «Mazuryna». U pryvatnaści, asabistyja rečy pierahladalisia ŭ paeta Davida Simanoviča i apazycyjanera Barysa Chamajdy.
Jak paviedamlaje BiełaPAN, pierad adjezdam na radzimu V.Bykava, u viosku Byčki Vušackaha rajonu, hości śviata naviedali viciebski Litaraturny muzej, dzie adkryłasia vystava, pryśviečanaja piśmieńniku.
Taciana Čabatarova, naviny.by