Viciebski žurnalist dva tydni pravioŭ u infiekcyjnym špitali i vylečyŭsia ad COVID-19
Viciebski žurnalist Hieorhij Karžanieŭski raspavioŭ baj.by, jak zachvareŭ na COVID-19 i vylečyŭsia ad jaho.
«Impartny» karanavirus
Apošnim časam Hieorhij Karžanieŭski šmat pracavaŭ za miažoj. U zamiežžy i padchapiŭ karanavirus, miarkuje jon: kali začynili miežy, Hieorhij znachodziŭsia ŭ Partuhalii. Try načy jon pravioŭ na aŭtavakzale ŭ Lisabonie — spadziavaŭsia vyjechać praź Ispaniju ŭ Polšču. Ale aŭtobusnych rejsaŭ nie było, i daviałosia lacieć samalotam da Minsku ź pierasadkaj u Amsterdamie. Niedzie tam i napatkała chvaroba, chacia da samaha viartańnia ŭ Viciebsk jon adčuvaŭ siabie dobra.
— U minskim aeraporcie ŭ tych, chto prybyŭ z Partuhalii, test na karanavirus nie brali. Daśledavali tolki tych, chto prylacieŭ z krain, dzie chvaroba ŭžo nabyła masavy charaktar. Ale mnie dali pamiatku pra toje, što treba 14 dzion pabyć u samaizalacyi i jak siabie pavodzić, kali samaadčuvańnie pahoršycca.
Pamiatka spatrebiłasia, kali ŭ mianie ŭźniałasia tempieratura: jak tam i było napisana, ja vyklikaŭ «chutkuju dapamohu», — raspavioŭ Hieorhij Karžanieŭski.
Viciebskaja infiekcyjnaja balnica
Žurnalist apynuŭsia ŭ infiekcyjnaj lakarni. Tam jamu zrabili test na COVID-19, vynik byŭ stanoŭčy. Spačatku Hieorhij byŭ adzin u pałacie, ale praź dzień pacyjentaŭ užo było troje.
— Nie mahu skazać, što lakarnia była «zabitaja». U kalidorach ludzi nie lažali. Ale ŭ pałatach volnych miescaŭ nie było. Jakimi lekami mianie lačyli, ja nie ŭdakładniaŭ, bo daviaraju śpiecyjalistam. Stavili kropielnicy, rabili ŭkoły, davali tabletki.
Lekaram vialiki dziakuj. U ich, sapraŭdy, vielmi šmat pracy, i pracujuć jany samaaddana.
Sprabujuć sartavać chvorych pavodle simptomaŭ, kab tyja, prykładam, u kaho niama kašlu, apynulisia ŭ adnoj pałacie, a tyja, u kaho vysokaja tempieratura — u inšaj. Ale vynikaŭ testaŭ davodzicca čakać doŭha, i nichto nie zastrachavany ad taho, što ŭ susieda pa pałacie jość karanavirus, a ŭ ciabie niama, — dadaje Hieorhij.
U špitali jon prabyŭ roŭna dva tydni. Jaho vypisali dachaty paśla dvuch admoŭnych testaŭ na COVID-19.
Parady žycharam Viciebska i ŭsioj krainy
Pavodle Hieorhija Karžanieŭskaha, usim treba być vielmi pilnymi — pa mahčymaści nie naviedvać hramadskich miescaŭ, nie ŭdzielničać u masavych mierapryjemstvach, paźbiahać zališnich kantaktavańniaŭ na vulicy ci ŭ kramie.
Futbolnyja spabornictvy, parady i subotniki — heta ciapier absalutna lišniaje, ličyć žurnalist. Zachady pa abmiežavańni stasunkaŭ kali nie dapamohuć paźbiehčy zaražeńnia ŭ pryncypie, to chacia b nie spravakujuć masavych pastupleńniaŭ chvorych u lakarni. Heta źmienšyć nahruzku i na lekaraŭ, jakija ciapier pracujuć «na pieradavoj», ryzykujučy ŭłasnym zdaroŭjem.
Kožny pavinny mieć adkaznaść i za siabie, i za bližniaha — navučycca być sacyjalna adkaznym.
Nahadajem, ź pnieŭmanijaj u lakarni zaraz znachodzicca jašče adzin viciebski žurnalist, Siarhiej Marcinovič.