SAAZ zaklikała Biełaruś nieadkładna ŭzmacnić miery baraćby z karanavirusam
Fota Nadziei Bužan
Situacyja ŭ Biełarusi vyklikaje zakłapočanaść i patrabuje nieadkładnaj realizacyi ŭsioabdymnaj źmiašanaj stratehii. Pra heta havorycca ŭ spravazdačy misii SAAZ pa vynikach vizitu ŭ Biełaruś z 8 pa 11 krasavika, paviedamlaje Tut.by. Raniej publikavałasia zajava SAAZ.
«Biełaruś ustupiła ŭ novy etap evalucyi pandemii COVID-19 ź pieradačaj infiekcyi siarod nasielnictva, što asabliva prykmietna ŭ asobnych častkach krainy, uklučajučy stalicu Minsk, horad Viciebsk i Viciebskuju vobłaść. Situacyja vyklikaje zakłapočanaść i patrabuje nieadkładnaj realizacyi ŭsioabdymnaj źmiašanaj stratehii», — havorycca ŭ spravazdačy.
Pierš za ŭsio ekśpierty źviartajuć uvahu na nieabchodnaść uzmacnieńnia mier fizičnaha dystancyjavańnia, a mienavita:
• pieranos ŭsich masavych mierapryjemstvaŭ, uklučajučy spartyŭnyja, kulturnyja, palityčnyja i relihijnyja;
• zabieśpiačeńnie dalejšaj izalacyi i lačeńnia pacyjentaŭ z paćvierdžanym COVID-19 i izalacyi va ŭmovach karancinu kantaktaŭ pacyjentaŭ z paćvierdžanym COVID-19;
• pierachod na addalenuju pracu i dystancyjnaje navučańnie, prypynieńnie dziejnaści ŭsich druharadnych arhanizacyj, pradpryjemstvaŭ i ekanamičnych subjektaŭ;
• tam, dzie addalenaja praca niemahčymaja, zabieśpiačeńnie strohaha vykanańnia mier prafiłaktyki i kantrolu, uklučajučy hihijenu ruk, reśpiratorny etykiet i fizičnaje dystancyjavańnie z zachavańniem biaśpiečnaha adlehłaści ŭ 1—1,5 m;
• zabieśpiačeńnie adlehłaści pamiž rabotnikami, abmiežavańnie kolkaści narad i sustreč i zabieśpiačeńnie naležnaj vientylacyi, asabliva ŭ miedycynskich ustanovach;
• minimizacyja nieabaviazkovych pierasoŭvańniaŭ, asabliva dla hrup vysokaj ryzyki i ŭraźlivych pacyjentaŭ.
«Vopyt pakazvaje, što takija miery zapavolvajuć raspaŭsiud virusa i dazvalajuć miedycynskim słužbam vyjhrać čas, nieabchodny dla adekvatnaj padrychtoŭki, abstalavańnia i pieraacenki patreb rabotnikaŭ achovy zdaroŭja i ŭstanoŭ u adkaz na rost kolkaści pacyjentaŭ z COVID-19», — adznačajuć ekśpierty.
Siarod biahučych mier reahavańnia SAAZ nazyvaje pavieličeńnie kolkaści miescaŭ praviadzieńnia łabaratornych daśledavańniaŭ, zabieśpiačeńnie jakaści test-sistem miascovaj vytvorčaści, abśledavańnie pry ŭjeździe, testavańnie na COVID-19 i 14-dzionnaja izalacyja dla ŭsich asob, jakija prybyvajuć u mižnarodnyja punkty ŭjezdu.
«Rehularnaje i ŭsiebakovaje infarmavańnie hramadskaści ab raźvićci situacyi z COVID-19 u Biełarusi, u tym liku danyja pa rehijonach, maje žyćciova važnaje značeńnie dla pavyšeńnia ŭzroŭniu razumieńnia składzienaha epidemijałahičnaha stanovišča, a taksama dla tłumačeńnia pryčyn pryniaćcia peŭnych ahulnanacyjanalnych mier, takich jak pieranos publičnych mierapryjemstvaŭ abo abmiežavańnie pieramiaščeńnia», — padkreślivajuć ekśpierty arhanizacyi.
Raniej da biełarusaŭ źviarnułasia pastajanny kaardynatar AAN u Biełarusi Iaana Kazana-Višniavieckaja. Jana adznačyła, što niahledziačy usie namahańni ŭ Biełarusi nazirajecca «evalucyja ŭspyški infiekcyi COVID-19» i zaklikała biełarusaŭ zastavacca doma, kab spynić raspaŭsiud infiekcyi.
U Biełarusi, pa dadzienych na 28 krasavika, zarehistravana 12 208 čałaviek z stanoŭčym testam na COVID-19. Vyzdaravieli i vypisanyja 1993 pacyjenta, pamierli 79.