Reuters: Kipr admaŭlaje błakavańnie sankcyj suprać biełaruskich čynoŭnikaŭ
Krynica z dypłamatyčnych kołaŭ Kipra abvierh Reuters infarmacyju ab tym, što Kipr błakuje ŭviadzieńnie sankcyj Jeŭrasajuza suprać biełaruskich čynoŭnikaŭ.
Pa słovach krynicy, Kipr padtrymlivaje sankcyi, ale paprasiŭ bolš času na vyvučeńnie pytańnia, bo ŭ Kipra nie chapaje resursaŭ razhledzieć jaho chutka.
Raniej u ŚMI źjavilisia paviedamleńni, što Kipr nakłaŭ vieta na ŭviadzieńnie sankcyj, źviazaŭšy pytańnie z uzmacnieńniem žorstkaści sankcyj suprać Turcyi. Kipr patrabuje ŭvieści abmiežavańni ŭ dačynieńni da Turcyi za bureńnie i raspracoŭku radoviščaŭ hazu ŭ Mižziemnym mory.
Kiraŭniki MZS krain ES uzhadnili ŭviadzieńnie sankcyj suprać asob, adkaznych za hvałt i falsifikacyju vybaraŭ u Biełarusi. U sankcyjny śpis mohuć trapić 40—50 čałaviek.