Daradca Trampa zapatrabavaŭ nieadkładnaha vyzvaleńnia palittechnołaha Šklarava
Ułady ZŠA zaklikajuć Minsk nieadkładna vyzvalić palittechnołaha Vitala Šklarava, zatrymanaha ŭ kancy lipienia ŭ Homieli, zajaviŭ daradca ŭ halinie nacyjanalnaj biaśpieki prezidenta ZŠA Robiert O'Brajen, piša «Radyjo Svaboda».
«Złučanyja Štaty zaklikajuć da nieadkładnaha vyzvaleńnia Vitala Šklarava, amierykanskaha hramadzianina i muža amierykanskaha dypłamata, niespraviadliva zatrymanaha ŭ Biełarusi amal na dva miesiacy tamu. Spadar Šklaraŭ pavinien być viernuty svajoj siamji», — havorycca ŭ paviedamleńni O'Brajena, apublikavanym u tvitary.
Šklarava zatrymali 29 lipienia ŭ Homieli. 7 žniŭnia jamu vystavili abvinavačvańnie ŭ arhanizacyi i padrychtoŭcy dziejańniaŭ, što hruba parušajuć hramadski paradak.
Sankcyi pavodle hetaha artykuła praduhledžvajuć da 3 hadoŭ pazbaŭleńnia voli.
Šklaraŭ — 44-hadovy ŭradženiec Homiela. Jak jon sam siabie pazicyjanavaŭ — «amierykanski, niamiecki i rasijski palityčny kansultant, palittechnołah, daradca vybarčych kampanij Baraka Abamy, Bierni Sandersa, Anhieły Mierkiel, Ksienii Sabčak». Žonka Šklarava — hramadzianka ZŠA, dypłamat, pracuje ŭ ambasadzie ZŠA ŭ Kijevie.