«M&M‑222» ruliŭ PLANava pa Viciebsku
dasłana čytačom
Kali 16 traŭnia ŭsia kraina siadzieła la televizaraŭ, čakajučy vynikovaha kancertu festu «Eŭrabačańnie», k słaŭnamu amfiteatru ŭ Viciebsku padjechaŭ šykoŭny «Citroën» ź mienskimi artystami. Na što jany spadziavalisia? Što niechta admovicca ad chatniaha superšoŭ i kiniecca va ŭtulny zalčyk tutejšaj «Muzyčnaj haścioŭni» na prašpekcie Frunze, 11? Ale ž kinulisia, i zala była bitkom, bo ŭ horad pryjechała davoli ŭžo raskručanaja akcyja «M&M‑222», arganizavanaja fan‑klubam biełaruskaha roku «Budźma svabodnymi» i adnajmiennaj kampanijaj «Budźma».
Šef muzyčna‑vydavieckaha łejbłu «BMAgroup» Vital Supranovič chucieńka raspavioŭ pra mety akcyi, pra ŭžo ździejśnienyja prezentacyi ŭ Harodni, Voršy, Połacku, Mahilevie, Miensku i... daŭ słova aŭtaram davoli viadomaha knižnaha falijanta «222 albomu biełaruskaha roku», druhoje vydańnie jakoha vabna źziała spad modnaha matavaha łaminata ćviordaha kalenkoru. Pakul jon kazaŭ toje, ja pačuŭ i pryčynu vidavočnaj aktyŭnaści viciebskich melamanaŭ: «Vo, ja ž tabie raspaviadała pra haradzienskija sprečki ŭ internecie», – kazała adna siabroŭka druhoj.
I tut, pakul lider hurta «P.L.A.N.» Andrej Plasanaŭ ustaloŭvaŭ aparaturu dla akustyčnaj padhučki, na scenu vyjšli Vitaŭt Martynienka i Anatol Mialguj. Jany časta vystupajuć hetak duetam, ale nikoli nie paŭtarajucca, majučy šmat što skazać ludziam. Surovy i razvažny Mialguj schodu zahruziŭ publiku gruntoŭnaj kancepcyjaj asensavańnia nacyjanalnaj prynaležnaści tvoraŭ muzyčnaha mastactva. I moh by pierahruzić mnohich, ale jaho stała pierapyniaŭ chutkimi reminiscencyjami šustry na trapnuju dumku Martynienka, jaki kazaŭ prykładna tak: «O, Tola, darečy, da pytańnia muzyčnaj krytyki jak źviazkavaha źviana pamiž muzykam i słuchačom. Niadaŭna razmaŭlaŭ ź Pitam Paŭłavym, jaki nazvaŭ krytykaŭ darmajedami na ciele muzyki. Jon maje racyju, darmajedaŭ chapaje, jakija prosta dzielacca svaimi chutkapłynnymi asabistymi ŭražańniami, ale ja jamu kažu: kamu ty pradasi svoj dysk u siońniašnim zvyšinfarmacyjnym śviecie? Kali krytyk vyznačyć stylistyčnyja prykmiety tvajoj muzyki, vykładzie peŭnyja analogii dy adroźnieńni ŭ muzyčnym śviecie, padzielicca mahčymymi emacyjnymi adkryćciami, to najpierš uźniknie chacia b sprečka vakoł ciabie, a potym i cikavaść da ŭłasna muzyki. A biez gruntoŭnaj krytyki, rastłumač mnie, čamu gitaryst Pit Paŭłaŭ z N.R.M. maje ŭsio ž bolšy papytovy rejtynh za ŭłasny prajekt Pita – GARADZKIJA? Ci ty admysłova ŭ svaim hurcie hraješ horš? Naŭrad ci. Prosta krytykam bolš padabajecca ŭ temach i emacyjnych fantazyjach N.R.M. pakapacca».
Admietnaj rysaj hetaj prezentacyi stała jašče j toje, što viciebskija melamany nia tolki zmahli kupić apošni mienski falijant dueta M&M, ale j prynamsi pabačyć ichniuju pieršuju knihu «Praz rok‑pryzmu», jakaja vyjšła roŭna 20 hod tamu ŭ ZŠA. Ciapier i jana dastupnaja nia tolki ŭ biblijatecy kangresu ZŠA, ale j u Nacyjanalnaj biblijatecy Biełarusi, na sajcie http://www.kamunikat.org , dzie vielmi doŭha stajała ŭ tamtejšym «Top'25» najbolš papytovych biełaruskich knih.
Nu i hutarka pra muzyku nie mahła abyjścisia biez samoj muzyki, tamu na scenu vyjšaŭ usio toj ža Andrej Plasanaŭ, pra hurt «P.L.A.N.» jakoha ŭ knizie jość čatyry recenzyi, dva kalarovyja plakaty, a jon syhraŭ greatest hits ažno vaśmi albomaŭ. Nie, vyjšła ŭ śviet pakul tolki šeść, ale Plasanaŭ lubić paradavać publiku zusim novymi napracoŭkami. I dziŭna było, kali šmat chto ŭ zali padpiavaŭ nia tolki staroje («Šynkaračku», «Ranišnija adčuvańni», «Cieni historyi»), ale j novaje, katoraha ja navat nazvy nie zapomniŭ. Vo, prynamsi «Sonca załatoje» na vieršy Natalli Arsieńnievaj, premjera jakoj niadaŭna adbyłasia na telekanale «Mir».
Kali my jechali nazad, jašče bolš dziŭna było čuć stohny Andreja: «Jakaja niaŭdača, ja pradaŭ usiaho tolki 16 dyskaŭ. Praŭda padpisaŭ štuk tryccać». Martynienka, jaki siadzieŭ pobač, tolki uchmylnuŭsia: «Nu ty, Andrej abnahleŭ: našyja raniejšyja kampańjony prezentacyjnych akcyjaŭ radavalisia, kali štuk 5‑6 pradaduć, a tabie 16 mała». Plasanaŭ supakojvajecca chutka, ale praciahvaje burčeć: «Ale ž čamu rajcentr Połacak zahrob schodu 60 štuk, a abłasny Viciebsk 16?»
Zatoje na knihu vicieblanie, fakt, nakinulisia bolš impetna za pałačan, Supranovič tolki paśpiavaŭ pački padnosić, a jašče ž impreza stała dla mnohich padstavaj nabyć šmatlikija biełaruskija CD‑navinki, jakich u Viciebsk čamuści nie zavoziać: «LitvinTroll», «Stary Volsa», «Džambibum», «Partyzone», «Miascovy čas», «Krama», a niechta ŭpieršyniu sprabavaŭ prysłuchacca da albomaŭ Dančyka, pra jakoha pačuli tolki padčas śmierci jahonaj babuli ŭ Amerycy.
Najbolš pryšpilna, što my nie pramirhali navat finalny kancert «Eŭrabačańnia», stereahuki jakoha raznosiła niejkaje radyjo ŭ mašynie. Dyk naš narvežski Rybak super‑hit usio ž zakiłbasiŭ ź biełaruska‑irlandzkim kalarytam! I voś hetak dzień prajšoŭ na vyklučna stanoŭčych emocyjach.
* * *
Vitaŭt Martynienka i Anatol Mialhuj — znakamityja muzyčnyja krytyki. Pra biełaruski rok pišuć z pačatku 80‑ych hadoŭ. Ich pieršaja kniha «Praz rok‑pryzmu» vyjšła u 1989 hodzie u ZŠA.
«222 albomy biełaruskaha roku» – praciah ich pieršaj knihi (biez anijakich paŭtoraŭ). Vydańnie ujaŭlaje ź siabie praktyčna encykłapiedyju biełaruskaj muzyki, bo praz vydańnie albomaŭ možna prasačyć historyju ajčynnaha roku. Kniha raskazvaje pra albomy našych kamand, što vychodzili nie tolki ŭ Biełarusi, ale i ŭ ZŠA da Polščy, Rasiei dy Francyi, Niamieččynie i Vielikabrytanii i inšych krainach ad 30 hadoŭ da našych dzion.
Usim naviednikam ŭ padarunak dysk «Fiestyvalny ruch Biełarusi» ad fan‑kłuba «Budźma svabodnymi».
Biełaruskija bardy Andrej Plasanaŭ i Taćciana Biełanohaja znajomiać amataraŭ sa svajoj tvorčaściu.
Nastupnyja sustrečy projduć:
22 maja. Brest. 18.00. vuł. Maładahvardziejskaja, 14/1 (kafe‑bar «Viektar»)
24 maja. Orša. Muziej U.Karatkieviča. (vuł. Lenina,26). 18.00.
26 maja. Homiel. Vuł. Palesskaja, 52 ( uprava AHP). 18.00
Uvachod volny!
Daviedki: 6490888