Sienat ZŠA ŭchvaliŭ «Akt ab demakratyi, pravach čałavieka i suvierenitecie Biełarusi»
Sienat ZŠA ŭchvaliŭ zakonaprajekt «Ab suvierenitecie, pravach čałavieka i demakratyi ŭ Biełarusi» (Belarus Democracy, Human Rights, and Sovereignty Act). Dakumient daje prezidentu ZŠA dadatkovyja paŭnamoctvy pa ŭviadzieńni sankcyj u suviazi z vybarami 2020 hoda ŭ Biełarusi i nastupnymi za imi padziejami.
Zakonaprajekt byŭ pradstaŭleny kanhresmenam Krysam Śmitam. Jon źjaŭlajecca adnym z aŭtaraŭ aktaŭ ab demakratyi ŭ Biełarusi 2004, 2006 i 2011 hadoŭ.
«Prezident ZŠA moža ŭvieści vizavyja sankcyi suprać luboha zamiežnika, jaki źjaŭlajecca siabram Centralnaj vybarčaj kamisii Biełarusi ci ŭdzielničaŭ u manipulacyjach na vybarach, abo ŭ dačynieńni da ŭradavaj asoby, adkaznaj za pieraśled niezaležnych ŚMI, albo pradstaŭnika sajuznaj dziaržavy, albo rasijskaha hramadzianina, jaki prymaŭ značny ŭdzieł u pieraśledzie ŚMI, parušeńni pravoŭ čałavieka adnosna palityčnych represij u Biełarusi», - havorycca ŭ tłumačeńni da dakumienta.
Akramia taho, abnoŭleny Akt ab demakratyi ŭ Biełarusi źmiaščaje nastupnyja pałažeńni:
- pryznaje Kaardynacyjnuju radu zakonnym instytutam dla ŭdziełu ŭ dyjałohu ab mirnaj pieradačy ŭłady i nie pryznaje Alaksandra Łukašenku «zakonna abranym lidaram Biełarusi»;
- zaklikaje pravieści novyja prezidenckija i parłamienckija vybary ŭ svabodnaj i spraviadlivaj formie ŭ adpaviednaści sa standartami ABSIE;
- zaklikaje vyzvalić usich palityčnych źniavolenych biez usialakich papiarednich umoŭ;
- padtrymlivaje imknieńnie naroda Biełarusi da svabody vieravyznańnia;
- dazvalaje dapamohu ŭ prasoŭvańni demakratyi i raźvićci hramadzianskaj supolnaści ŭ Biełarusi;
- zajaŭlaje, što ZŠA nie pryznajuć uklučeńnia Biełarusi ŭ Sajuznuju dziaržavu z Rasiejaj;
- patrabuje ad Złučanych Štataŭ stratehii pa prasoŭvańni viaščańnia, svabody internetu i dostupu da infarmacyi;
- akazvaje padtrymku biełaruskim ŚMI i pradstaŭnikam IT-siektara.
Raniej dakumient uchvaliła Pałata pradstaŭnikoŭ. Ciapier jaho maje padpisać prezident ZŠA.