U Homieli pad «administracyjku» trapili žurnalisty-fryłansiery. Ich abvinavacili ŭ supracoŭnictvie z «Biełsatam»
Siońnia ŭ Homieli sudzili žurnalistaŭ-fryłansieraŭ Łarysu Ščyrakovu i Jaŭhiena Mierkisa. Ich abvinavačvali pavodle administracyjnaha artykuła 23.5. KaAP Biełarusi «Parušeńnie zakanadaŭstva ab srodkach masavaj infarmacyi», paviedamlajuć «Mocnyja naviny».
U pratakole było skazana, što 25 sakavika telekanał «Biełsat» prademanstravaŭ rolik, aŭtaram jakoha źjaŭlajecca Jaŭhien Mierkis. Sam ža Jaŭhien zajaviŭ, što mantavać rolik i vypuskać jaho na «Biełsacie» nie moh, bo žyvie ŭ Homieli, a nie ŭ Varšavie. Taksama žurnalist ličyć, što nie było nijakich pierakanaŭčych dokazaŭ, što hetuju «pradukcyju ŚMI» zrabiŭ mienavita jon.
Mierkisa asudzili na 25 bazavych, na siońnia heta 725 rubloŭ.
Jak raspaviała Łarysa Ščyrakova, uručeńnie pozvy ŭ sud adbyvałasia davoli dziŭnym čynam: spačatku joj pisali ŭ sacyjalnych sietkach z «fejkavych akaŭntaŭ», a potym pačali telefanavać na numar jaje niepaŭnaletniaha syna.
Žurnalistku abvinavacili ŭ tym, što jana stvaryła rolik, jaki paśla demanstravaŭsia na «Biełsacie». Žančyna vinu svaju nie pryznała, na pytańnie ab akredytacyi zajaviła, što nie źjaŭlajecca žurnalistkaj «Biełsata», tamu i akredytacyja joj nie patrebnaja. Jana taksama adznačyła, što nijakich dokazaŭ jaje viny nie pradstavili. Rašeńnie suda — 25 bazavych vieličyń.