ES rychtuje sankcyi ŭ dačynieńni da «Biełavija» i dziasiatka pradstaŭnikoŭ avijacyjnych uładaŭ Biełarusi
Jeŭrapiejski sajuz rychtuje sankcyi ŭ dačynieńni da «Biełavija» i kala dziasiatka vysokapastaŭlenych biełaruskich avijacyjnych čynoŭnikaŭ, zajavili try dypłamaty ahienctvu Reuters.
Prapanavanyja zamarožvańnie aktyvaŭ i zabarona na pajezdki źjaŭlajucca častkaj pakieta novych sankcyj u dačynieńni da Biełarusi z boku dziaržaŭ ES.
Sa słoŭ dypłamataŭ, pierš čym uvodzić siektaralnyja ekanamičnyja sankcyi 21 červienia, ES uviadzie mienšy sankcyjny śpis u dačynieńni da fizičnych asob i dźviuch jurydyčnych asob u jakaści šparkaha pramiežkavaha adkazu.
«Usie dziaržavy ES zhodnyja z takim padychodam», — skazaŭ adzin dypłamat. Druhi dypłamat zajaviŭ, što heta budzie «vyrazny sihnał Łukašenku ab tym, što jaho dziejańni niebiaśpiečnyja i nieprymalnyja».
Čakajecca, što pad sankcyi patrapiać vysokapastaŭlenyja čynoŭniki ministerstva abarony i transpartu Biełarusi, vajskoŭcy vajskova-pavietranych sił, vysokapastaŭleny čynoŭnik Minskaha aeraporta i vysokapastaŭleny čynoŭnik cyvilnaj avijacyi, paviedamili dypłamaty.
Taksama ŭ čorny śpis i zabaronu na viadzieńnie biznesu ź ES budzie ŭniesiena jašče adno dziaržaŭnaje pradpryjemstva z avijacyjnaha siektara.