«Jak vy dumajecie, chto ŭ hetych adnosinach mužčyna?» U Babrujsku vynieśli prysud 19-hadovamu Hlebu Łukjancovu, jakoha abvinavačvali ŭ abrazie Łukašenki
Pavodle abvinavačvańnia, Hleb Łukjancoŭ 8 červienia 2021 pakinuŭ u telehram-čacie «Karatieli Biełarusi» abraźlivy kamientar pad publikacyjaj supolnaj vyjavy Łukašenki i Pucina i tekstam da jaho: «Samaja miłaja para Uschodniaj Jeŭropy. Jak vy dumajecie, chto ŭ hetych adnosinach mužčyna?», paviedamlajuć pravaabaroncy.
Hleb vinu pryznaŭ całkam. Rastłumačyŭ, što nie mieŭ mety abrazić Łukašenku, a prosta napisaŭ kamientar. Adnak razumieŭ, što svaimi dziejańniami padryvaje aŭtarytet i dziaržavy, i jaje kiraŭnika. Kamientar abvinavačvany pakinuŭ na emocyjach «z-za pradastaŭleńnia kredytu Biełarusi».
Dziaržabvinavaŭca prasiła vyvučać materyjały spravy ŭ zakrytym režymie, sud adchiliŭ takoje chadajnictva. Tady prakurorka Iryna Chadnievič prasiła «dziela etyki nie začytvać pakinuty kamientar usłych».
U sprečkach bakoŭ prakurorka źviarnuła ŭvahu suda, što abvinavačany ŭdzielničaŭ u niesankcyjanavanych masavych mierapryjemstvach, pryciahvaŭsia da administracyjnaj adkaznaści, a ŭ nastupnym — pakinuŭ kamientar u adras kiraŭnika dziaržavy, jaki nosić jaho niehatyŭnuju acenku. Iryna Chadnievič zapeŭnivała, što vypraŭleńnie Hleba moža być dasiahnuta tolki pry pryznačeńni jamu pakarańnia, źviazanaha sa strohaj izalacyjaj ad hramadstva, i prasiła pazbavić chłopca svabody terminam na adzin hod.
Adnak sudździa Dźmitryj Krenžyjeŭski pastanaviŭ pryznać Hleba vinavatym i pryznačyć jamu 1,5 hoda «chatniaj chimii».