Biełaruś pačała pastaŭku elektraenierhii va Ukrainu. Ale heta nie doŭhaterminovy kantrakt
Jak paviedamlaje Minenierha, ź siońniašniaha dnia biełaruskaja elektraenierhija pačała pastupać va ŭkrainskuju enierhasistemu. Zhodna z kantraktam, pastaŭlać elektraenierhiju Biełaruś budzie na praciahu listapada.
Rasijski «Kommiersant» adznačaje, naprykancy kastryčnika ŭkrainskaja kampanija «Enierhaatam» vykupiła 885 z 900 dastupnych MVt mahutnaściaŭ miždziaržaŭnych linij elektrapieradač, kab u listapadzie impartavać enierhiju ź Biełarusi. Jašče 15 MVt nabyła kampanija «Elektra kamjunici».
Apošniaja zajaviła, što razhladaje Biełaruś u jakaści reziervovaha pastaŭščyka elektraenierhii ŭ krainu na vypadak deficytu mahutnaści.
Pry hetym, jak piša delfi.lt, ukrainskaje Minenierha zajaviła, što nie maje doŭhaterminovych kantraktaŭ na pastaŭku elektraenierhii ź Biełarusi.
Nahadajem, što 2 kastryčnika Ukraina paprasiła ŭ Biełarusi dapamohi ŭ avaryjnych pastaŭkach elektraenierhii. Susiedniaja kraina paprasiła kala 3500 MVt, z-za niedachopu mahutnaści ŭ enierhasistemie.