Prezident Polščy nazvaŭ situacyju na miažy «hibrydnaj akcyjaj suprać Polščy i ES»
U Polščy zaviaršyłasia sustreča ŭ Biuro nacyjanalnaj biaśpieki, pryśviečanaja situacyi na biełaruska-polskaj miažy. Vyniki pasiadžeńnia padvioŭ prezident krainy Andžej Duda. U razmovie z žurnalistami jon adznačyŭ, što polskija słužby byli hatovyja da padobnych scenaraŭ, piša vydańnie Wpolityce.
«Treba dakładna skazać: heta hibrydnaja akcyja, jakaja pravodzicca biełaruskim režymam suprać Polščy i ES. Hrupy mihrantaŭ, jakija iduć da polskaj miažy, nakiroŭvalisia biełaruskimi słužbami, jakija paviali ich sa zvyčajnaj darohi ŭ les, tak što jany atakavali polska-biełaruskuju miažu, dzie niama pierachodu», — skazaŭ jon.
Nočču surjoznych zdareńniaŭ na ŭčastku biełaruska-polskaj miažy nie było, ale mihranty pryniali niekalki sprob niezakonnaha pierasiačeńnia miažy.
«Na hety momant u nas tam na miažy łahier mihrantaŭ, jakija ź biełaruskaha boku zabłakavanyja biełaruskimi słužbami, tamu jany nie mohuć pakinuć terytoryju. U hetym łahiery bližej za ŭsio da miažy znachodzicca kala tysiačy čałaviek» — adznačyŭ Duda.