U Danii prapanujuć čaćviortuju pryščepku ad karanavirusa
Čaćviortuju dozu vakcyny ad kavidu samym uraźlivym prapanujuć u Danii, pra heta zajaviŭ ministr achovy zdaroŭja. Pryčym kraina skaraciła z 7 da 5 miesiacaŭ termin dziejańnia «pašpartoŭ zdaroŭja» dla žycharoŭ biez bustarnaj pryščepki.
Punkt vakcynacyi ŭ Kapienhahienie. Fota Getty Images
Ułady Danii dali žycharam krainy mahčymaść atrymać užo čaćviortuju dozu vakcyny ad karanavirusa. Bustarnuju pryščepku prapanujuć ludziam, najbolš uraźlivym ad infiekcyi, zajaviŭ ministr achovy zdaroŭja Mahnus Chieŭnikie ŭ sieradu. Orhany achovy zdaroŭja źviažucca ź imi ŭ najbližejšyja dni, paviedamlaje Deutsche Welle.
Adnačasova aficyjny Kapienhahien skaraciŭ termin dziejańnia tak zvanaha pašparta zdaroŭja. Ciapier u žycharoŭ karaleŭstva, jakija zrabili dźvie pryščepki ad kavidu, hety dakumient dziejničaje na praciahu piaci miesiacaŭ paśla druhoj dozy vakcyny — zamiest siami. Treci ŭkoł, jaki zrabili 54,6 adsotka žycharoŭ, aznačaje nieabmiežavany termin dziejańnia pašparta.
Akramia taho, dackija ŭłady abviaścili ab adnaŭleńni raboty ŭstanoŭ kultury, jakija byli vymušanyja 19 śniežnia začynić svaje dźviery dla naviedvalnikaŭ. Na mierapryjemstvy ŭ pamiaškańniach buduć puskać nie bolš za 500 čałaviek.
Pavodle źviestak partała Worldometer, z pačatku pandemii ŭ Karaleŭstvie z 5,8 młn čałaviek uzbudžalnik COVID-19 vyjaŭleny prykładna ŭ adnaho miljona. Kala 3400 chvorych pamierli, 746 tysiač vyzdaravieli.