Śledčy abłasnoj prakuratury paraiŭ napisać skarhu na paciarpiełuju
Kiraŭnica hramadskaj inicyjatyvy «Žančyny suproć biezzakońnia ŭ sudoch i prakuratury» praciahvaje baranić svoj honar i hodnaść.
Minski abłasny sud nie zadavoliŭ kasacyjnuju skarhu Haliny Jubko.
6 žniŭnia Minski abłasny sud nie zadavoliŭ kasacyjnuju skarhu kiraŭnicy hramadskaj inicyjatyvy «Žančyny suproć biezzakońnia ŭ sudoch i prakuratury» Haliny Jubko. Raniej joj admoviŭ
Krupski rajonny sud.
Žančyna baraniła ŭ sudach svaje honar i hodnaść, a nahodaj dla hetaha stała zajava dvuch śviedak, što prachodziać pa spravie zabojstva rodnaj siastry H. Jubko.
Jak stała viadoma na adnym z sudovych pasiedžańniaŭ, skarhu ŭ prakuraturu Minskaj vobłaści, u jakoj śviedki źviartalisia z prośbaj nakiravać Halinu Jubko na prymusovuju psichijatryčnuju ekśpiertyzu, skłaŭ advakat Krupskaj jurydyčnaj kansultacyi. A paraiŭ napisać hetuju zajavu śledčy abłasnoj prakuratury. Apošniaje zafiksavanaje sa słovaŭ śviedak u pratakole sudovaha pasiedžańnia. «Krupski advakat parušyła zakon, napisaŭšy tuju zajavu. Ale zrabiła heta nahetulki ŭpeŭniena, što składvajecca ŭražańnie poŭnaj upeŭnienaści va ŭłasnaj niepakaranaści», — miarkuje pravaabaronca Tamara Siarhiej. Jana kaža, što heta nahadvaje zmovu čynoŭnikaŭ: «Zamiest taho, kab šukać zabojcaŭ, śledčyja prakuratury rajać śviedkam pisać skarhi na paciarpiełuju, advakat heta afarmlaje, a sud «nie źviartaje» na hetyja parušeńni zakonu ŭvahi».
Hramadskaja inicyjatyva «Žančyny suproć biezzakońnia ŭ sudoch i prakuratury» abjadnoŭvaje kala sta čałaviek z usioj krainy. Pieravažna heta žančyny, jakija damahajucca pierahladu niespraviadlivych na ichny pohlad spraŭ. Za čas isnavańnia hrupy, jaje ŭdzielniki nieadnarazova źviartalisia ŭ Hienieralnuju prakuraturu, Viarchoŭny sud i niepasredna da kiraŭnika krainy. U časie červieńskaha vizitu ŭ Biełaruś Bienity Fierery-Valdnier jany zdoleli pieradać jeŭrapiejskaj hości admysłovy zvarot da hienieralnaha sakratara AAN Pan Hi Muna, hiensakratara Rady Jeŭropy Tery Devisa, dyrektara Biuro pa demakratyčnych instytutach i pravach čałavieka ABSIE Janezu Lenarčyku i, ułasna, da jeŭrakamisara pa źniešniaj palitycy Bienity Fierery-Valdnier.