Baranavickija taksisty «Jandeksa» źbiralisia na zabastoŭku, ale ich užo čakała milicyja
Infarmacyja pra toje, što baranavickija taksisty «Jandeks Go» niezadavolenyja źmienami ŭ sistemie apłaty i źbirajucca 10 maja bastavać, napiaredadni raspaŭsiudžvałasia pa sacsietkach. U 7 ranicy taksisty płanavali źjechacca «na bujnuju zabastoŭku» na parkoŭcy kala handlovaha centra «Karona», piša Intex-press.
Fota: Taćciana Malež / Intex-press
Adnak u hety dzień, z samaj ranicy na parkoŭcy kala HC dziažuryli try aŭtamabili DAI i bus MUS.
Jak tolki na parkoŭku padjazdžali taksi, da mašyn padychodzili inśpiektary i prasili źjechać. Pry hetym supracoŭniki milicyi pierapisvali numary aŭtamabilaŭ. Darečy, kali taksist moh dakazać, što pryjechaŭ na zamovu, to jamu dazvalali zastavacca i biez prablem čakać svajho pasažyra.
Jak raspaviali Intex-press vadzicieli «Jandeks Go», u hety dzień jany chacieli sabracca i abmierkavać svaje prablemy, kab sfarmulavać patrabavańni da płatformy «Jandeks taksi», jakaja źniziła taryfy.
Siarod inšaha baranavickija taksisty žadajuć, kab rasijskaja płatforma pavysiła apłatu za padaču aŭtamabila da 2 rubloŭ, tady jak ciapier hetaja suma składaje 1,40 rubla.
Kiłamietr prajezdu pa Baranavičach ciapier kaštuje 41 kapiejku, pa rajonie — 70 kapiejek. Vadzicieli taksi, chacieli b, kab hetyja sumy pavysili, chacia b na 50 kapiejek.
Taksama jość prapanovy pa źmienach u sistemie vystaŭleńnia zorak, admienie harantavanaj sumy ŭ 150 rubloŭ za vykanańnie 45 zakazaŭ za źmienu i šmat inšaha.
Vadzicieli skardziacca, što ciapier, kab narmalna zarabić, im davodzicca pracavać pa 16 hadzin na sutki bieź pierapynkaŭ. Pa ich słovach, vialikaja kolkaść avaryj z udziełam «Jandeks-taksi», abumoŭlenaja stomlenaściu ad praciahłych źmien, na jakija jany vychodziać kožny dzień. Pry hetym zarobki ŭ vadzicielaŭ zastajucca raniejšymi, a ceny na paliva i absłuhoŭvańnie aŭto ŭ apošnija niekalki miesiacaŭ pastajanna rastuć. Kab heta ŭsio kampiensavać taksistam, treba ŭsio bolš zarablać, a dla hetaha jašče bolš času pravodzić za rulom.
Na minułym tydni, 4 traŭnia, bastavali babrujskija taksisty.