Sidorski zapatrabavaŭ ad ahraryjaŭ i vučonych
pavyšeńnia ŭradžajnaści cukrovych burakoŭ u Biełarusi da jeŭrapiejskaha ŭzroŭniu
Premjer‑ministr Siarhiej Sidorski zapatrabavaŭ ad ahraryjaŭ i vučonych pavyšeńnia ŭradžajnaści cukrovych burakoŭ u Biełarusi da jeŭrapiejskaha ŭzroŭniu. Jak paviedamiła pres‑słužba ŭrada, pra heta premjer zajaviŭ 27 žniŭnia padčas naviedvańnia AAT «Haradziejski cukrovy kambinat».
Kiraŭnik urada zaznačyŭ, što za apošnija hady asobnyja haspadarki krainy dabilisia ŭradžajnaści cukrovych burakoŭ u 500—560 c/ha. Adnak u Jeŭropie hety pakazčyk dasiahaje 700 c/ha. «I nam treba imknucca da hetaj płanki, spyniacca nielha. U nas jość ziamla, technałohii, treba tak vyroščvać buraki, kab atrymać maksimalnuju addaču», — skazaŭ Sidorski.
Jon ukazaŭ na nieabchodnaść novych navukovych idej pa pavyšeńni cukrystaści cukrovych burakoŭ.
«My ŭžo 2‑3 hady topčamsia na miescy. U Jeŭropie vychad cukru z hiektara ŭdvaja vyšejšy.
Kali pa pavyšeńni ŭradžajnaści ziernia ŭ nas jość zruchi, to pa burakach patrebny novyja idei, novyja raspracoŭki vučonych», — padkreśliŭ Sidorski.
Sioleta ŭ Biełarusi płanujecca sabrać bolš jak 4 młn. t cukrovych burakoŭ. Premjer‑ministr zaznačyŭ, što hałoŭnaja zadača ahraryjaŭ siońnia — u ścisłyja termin ŭbrać uradžaj. «Na suśvietnym rynku cana na cukar uzrastaje, jość pierśpiektyvy za košt dadadzienaha koštu, ekspartnych pastavak atrymlivać bolš ad pradpryjemstvaŭ hetaj haliny», — skazaŭ jon, zaznačyŭšy, što ŭ lik dziaržzakazu sioleta pavinna być pastaŭlena 3,5 młn. t cukrovych burakoŭ, nieabchodna vyrabić jak minimum 511 tys. t cukru.
Analizujučy rekanstrukcyju i pieraasnaščeńnie cukrovych zavodaŭ krainy za apošnija hady, kiraŭnik urada zaznačyŭ, što jana idzie «dastatkova paśpiachova». Sidorski padkreśliŭ, što prezident Biełarusi pryniaŭ rašeńnie ab restrukturyzacyi niekatorych daŭhoŭ pradpryjemstvaŭ, što daść mahčymaść pieraasnaščać ich bolš aktyŭna. «Sioleta my faktyčna vychodzim na zapłanavanyja mahutnaści pa pierapracoŭcy», — skazaŭ premjer‑ministr. — My dabivalisia hetaha na praciahu apošnich troch hadoŭ. Nastupny etap — vychad na 6 młn. ton».
Premjer‑ministr asablivuju ŭvahu źviarnuŭ na pavyšeńnie cen na cukar na suśvietnym rynku. «My nie pavinny ŭpuskać hetuju mahčymaść, stvarajcie novyja mahutnaści, pierapracoŭvajcie, rabicie ŭsio, kab addavać dziaržavie bolš», — padkreśliŭ jon.