Z kanca červienia Ukraina źniščyła 14 vajennych baz i składaŭ uzbrajeńnia ŭ tyle rasijskich vojskaŭ
Za apošnija dva tydni (z kanca červienia pa pačatak lipienia) karespandenty BBC News Ukraina naličyli kala dziasiatka dakładnych udaraŭ pa składach bojeprypasaŭ i vajskovych bazach rasijskich vojskaŭ na zachoplenych ukrainskich terytoryjach.
Takija padliki pryvodzić BBC News Ukraina.
Havorka idzie ab udarach pa składach i bazach u «hłybokim tyle» rasijskich vojskaŭ — za 5-75 kiłamietraŭ ad frontu, adznačajuć žurnalisty. Siarod takich vypadkaŭ vydańnie nazyvaje:
— udary pa infrastruktury Uzbrojenych sił RF u Novaj Kachoŭcy (Chiersonskaja vobłaść) i składzie bojeprypasaŭ u Pieravalsku (Łuhanskaja vobłaść), 28 červienia;
— udar pa składzie bojeprypasaŭ u Papasnaj (Łuhanskaja vobłaść), 2 lipienia;
— udary pa dźviuch vajennych bazach u Mielitopali (Zaparožskaja vobłaść), 3 lipienia;
— vybuch na bazie ŭ Śniažnym (Danieckaja vobłaść), 4 lipienia;
— vybuch na bazie ŭ «Kamaz-centry» ŭ Daniecku i na składzie ŭ Kadzijeŭcy (Łuhanskaja vobłaść), 5 lipienia;
— vybuchi na bazach i składzie ŭ Vialikim Burłuku (Charkaŭskaja vobłaść), Makiejeŭcy (Danieckaja vobłaść) i Chiersonie, 6 lipienia;
— udar pa naftabazie ŭ Daniecku, 7 lipienia;
— vybuchi na składach u Šachciorskim (Danieckaja vobłaść) i Novaj Kachoŭcy (Chiersonskaja vobłaść, 8 lipienia.
Infarmacyju i videa ŭdaraŭ žurnalisty «Bi-bi-si» sabrali pa adkrytych krynicach — roliki vidavočcaŭ, paviedamleńni vajennych karespandentaŭ, błohieraŭ i miascovych čynoŭnikaŭ. Niekatoryja vypadki vybuchaŭ paćvierdziła ŭpraŭleńnie stratehičnych kamunikacyj Uzbrojenych sił Ukrainy.
Hienštab USU i Minabarony RF aficyjna hetyja vypadki nie kamientavali.