Siłaviki pišuć, što na Lebiadka zaviali kryminałku za intervju ekstremisckamu farmavańniu. Ale jaho zatrymali na tydzień raniej, čym ŚMI ŭnieśli ŭ śpis MUS
Siońnia stała viadoma, što na navukoŭca i vajennaha ekśpierta Jahora Lebiadka zaviedzienaja kryminalnaja sprava pa artykule 361-4 (sadziejničańnie ekstremisckaj dziejnaści). Jak śćviardžaje kanał siłavikoŭ, pryčyna — intervju Lebiadka «Jeŭraradyjo». Ale jość niuans.
Jahor Lebiadok. Fota z sacyjalnych sietak
Vajennaha ekśpierta zatrymali 13 lipienia. «Jeŭraradyjo» pryznali ekstremisckim farmavańniem paźniej — 20 lipienia. Na momant intervju ŚMI nie mieła statusu ekstremistaŭ.
Śpis ekstremisckich farmavańniaŭ składaje MUS. Dla taho, kab uklučyć tudy lubuju «niepažadanuju» arhanizacyju, nie patrebny navat sud (jaki ŭžo taksama staŭ farmalnym u palityčna matyvavanych spravach) — siłaviki sami prymajuć hetaje rašeńnie. Što i ŭ jaki momant paličyć supracoŭnictvam, taksama, jak vynikaje, vyrašajecca advolna.
Pra kryminalnuju spravu stała viadoma, kali Lebiadok nie vyjšaŭ paśla 15 sutak. Ich jamu dali nibyta za niepadparadkavańnie (art. 24.3 KoAP).
U studzieni Lebiadok byŭ zvolnieny ź dziaržaŭnaha navukova-vytvorčaha abjadnańnia «Optyka, optaelektronika i łaziernaja technika», jakoje naležyć NAN RB, paśla zakaznoha paskvila prapahandysta Mukavozčyka.