Były kamandzir MNS Alaksandr Kurhanski vyjšaŭ na volu. Jaho trymali za kratami za łajk pad kamientarom
Alaksandr Kurhanski bolš za 15 hadoŭ prapracavaŭ u MNS. Pierad zatrymańniem byŭ kamandziram adździaleńnia ŭ častcy № 7 u Hrodnie.
Alaksandr paśla vyzvaleńnia
Jaho zatrymali 30 vieraśnia 2021 hoda pa «spravie Zielcera». Padstavaj dla zatrymańnia Alaksandra staŭ łajk, jaki mužčyna pastaviŭ na kamientar inšaha čałavieka ŭ zapisie pra abmierkavańnie pierastrełki pamiž ajcišnikam Andrejem Zielceram i supracoŭnikam KDB Dźmitryjem Fiedasiukom.
Paśla hetaha jaho zvolnili i abaviazali vypłacić siem tysiač rubloŭ pa kantrakcie, paviedamlaje «Viasna».
Kurhanskaha abvinavacili pavodle art. 369 KK (Abraza pradstaŭnika ŭłady) i č. 1 art. 130 KK (Raspalvańnie sacyjalnaj varožaści). 12 žniŭnia 2022 hoda palitviaźniu prysudzili 1,5 hoda kałonii, a taksama štraf u pamiery 1600 rubloŭ.
28 červienia 2022 h. KDB unios Alaksandra ŭ śpis asobaŭ, «datyčnych da terarystyčnaj dziejnaści», a ŭ vieraśni — da «ekstremisckaj».
Alaksandr całkam adbyŭ termin i 17 kastryčnika vyjšaŭ na volu ź viciebskaj kałonii № 3, dzie jaho amal dva miesiacy ŭtrymlivali ŭ «karancinie».