Traščanok zarezaŭ atlas
Zabaronieny jašče adzin dapamožnik pa historyi Biełarusi.
Zabaronieny jašče adzin dapamožnik pa historyi Biełarusi.
Historyk Aleh Pierzaškievič, jaki pracuje na katedry staražytnych časoŭ i ciaredniaviečča histfaku BDU, padrychtavaŭ atlas pa historyi Biełarusi XVI–XVIII st. dla vučniaŭ siomaj klasy. Adnak najchutčej školniki nia ŭbačać jaho ŭ vieraśni.
Atlas prajšoŭ praź instancyi Minadukacyi, ale paśla byŭ nakiravany na razhlad dziaržkamisii, choć padobnaja praktyka nikoli nie prymianiałasia da atlasaŭ. I zabuksavaŭ. «Była rekamendacyja ad kamisii, što praca pavinna być dapracavana za podpisam Jakava Traščanka, – kaža Aleh Pierzaškievič. – Hetaja kamisija za apošnija try hady, zdajecca, naahuł nivodnaha dapamožnika nie zaćvierdziła, aproč «Kursu pa Vialikaj Ajčynnaj vajnie». Pakutujuć usie, nia ja adzin». Ja.Traščanok staŭ viadomy šyrokaj hramadzkaści jak aŭtar ciemrašalskaha padruč–nika pa historyi Biełarusi, rekamendavanaha dla vykarystańnia ŭ VNU, a taksama jak kolišni vykładčyk A.Łukašenki.
U krainie z 1993 h., kali ŭ škołach pačali vyvučać kurs pa historyi Biełarusi, vyjšła tolki dva atlasy – pa historyi staražytnaj Biełarusi, a taksama pa historyi Siaredniaviečča. Pa historyjach bolš rańnich peryjadaŭ vučni nia majuć nijakich dapamožnikaŭ, kab rychtavać uroki, aproč samoha padručnika.
Tym nia mienš sp.Pierzaškievič ličyć Ja.Traščanka achviaraj sytuacyi, što skłałasia ŭ histaryčnaj navucy. «Traščanka paprasiŭ zaniacca hetym prezydent, i jon nie admoviŭ, choć i moh, spasłaŭšysia na stan zdaroŭja ci niešta inšaje. Mahiloŭskaha vykładčyka zrabili niejkim pudziłam, choć ja nia schilny razhladać jaho jak usiomahutnaha cenzara. Pa-čałaviečamu mnie navat škada jaho», – kaža A.Pierzaškievič. Jon ličyć, što kali atlas i trapić na razhlad, dyk budzie zabrakavany, choć tam i niama supiarečnaściaŭ z padručnikam pa historyi dla siomaj klasy.
«Usie čakajuć zahadu źvierchu», – śmiajecca A.Pierzaškievič.