U Maskvie vykrali žonku byłoha pieršaha namieśnika ministra abarony. U Rasii novy vid telefonnaha machlarstva
U Maskvie vykrali žonku byłoha pieršaha namieśnika ministra abarony i kamandujučaha Pavietrana-desantnymi vojskami Alaksandra Kałmakova. Mahčyma, heta sprava ruk telefonnych machlaroŭ.
Alaksandr Kałmakoŭ
Toje, što žonka źnikła, hienierał, jaki ciapier kiruje DTSAAF Rasii, vyjaviŭ uviečary 10 maja. Kałmakoŭ viarnuŭsia z pracy i nie znajšoŭ jaje doma. Apošni raz jany bačylisia ranicaj — žančyna pajšła na pracu, i ničoha dziŭnaha Kałmakoŭ nie zaŭvažyŭ. Tym ža viečaram hienierału patelefanavaŭ nieviadomy, jaki zajaviŭ, što žonka Kałmakova vykradziena i za jaje treba zapłacić vykup miljon rasijskich rubloŭ (13 300 dalaraŭ), inakš jaje čakajuć niepryjemnaści. Kałmakoŭ patelefanavaŭ u palicyju, piša Baza.
Chutčej za ŭsio heta sprava ruk telefonnych «vykradalnikaŭ»: apošnim časam u Rasii pačaścilisia vypadki «vykradańnia» ludziej pa telefonie.
Achviaram telefanujuć ašukancy, raspaviadajuć im historyju pra pieraśled i prymušajuć chavacca ad rodnych, nie adkazvać na zvanki i paviedamleńni, a zatym patrabujuć vykup u svajakoŭ «vykradzienych». Niadaŭna tak vykrali maci pamočnicy sienatara Savieta fiederacyi Andreja Šaŭčenki. Žančyna kupiła novuju simku, kab jaje nie mahli adsačyć, pastajanna mianiała transpart i chavałasia niekalki dzion. Jaje znajšli ŭ adnoj z padmaskoŭnych haścinic.
Čytajcie taksama:
Biełarusbank papiaredziŭ, što ad jaho imia dziejničajuć machlary
Žančyna z Brasłava pavieryła ašukancam i straciła 200 tysiač dalaraŭ
Piensijanierku z Marjinaj Horki abduryli bolš čym na 60 tysiač dalaraŭ machlary ź Mieksiki