Francuzski komik nazvaŭ Nietańjachu «abrezanym nacystam». Heta vyklikała burnuju palemiku
Papularny humaryst pažartavaŭ tak u efiry radyjo France Inter.
Hijom Miorys. Fota: aficyjny sajt humarysta i žurnalista guillaumemeurice.fr
Jak paviedamlaje Le Monde, Radyjo Francyja (Radio France) trapiła pad ahoń krytyki z-za žarta papularnaha humarysta. Zaprošany dla ŭdziełu ŭ humarystyčnaj prahramie Le grand dimanche soir («Vialiki niadzielny viečar») na kanale France Inter humaryst Hijom Miorys (Guillaume Meurice), pačaŭ pieraličvać «kaściumy dla taho, kab nastrašyć» u nadychodziačy Chełoŭin.
«Ciapier jość kaścium Nietańjachu, jaki niadrenna cpracuje, — skazaŭ Merys. — Vy viedajecie, chto heta? Niby nacyst, ale abrezany».
Jaho słovy byli asudžanyja jak antysiemickija i abraźlivyja mnohimi słuchačami, palitykami, žurnalistami i hramadskimi dziejačami. Akramia hetaha, žartaŭniku stali pahražać śmierciu.
Viadomy advakat kanała CNews Žyl-Viljam Holdnadel (Gilles-William Goldnadel), zajaviŭ, što padaść pazoŭ suprać taho, kaho jon achryściŭ «MeuriSS» (padvajeńnie zyčnych nahadvaje ab atradach SS).
«Z abrazańniem ci biez: ja chutčej za toje, kab abrezać čas efiru Hijoma Miorysa (i mandat Nietańjachu taksama, ale heta inšaja historyja)», — vykazałasia ŭ svaju čarhu rabin Delfin Arvilor (Delphine Horvilleur).
Dyrektar Radio France Adela Van Ryt (Adèle Van Reeth) vymušanaja była prasić prabačeńnia za žart i abaraniać svabodu vykazvańnia humarystaŭ:
«Isnavańnie prastory dla palityčnaj satyry, u jakoj možna vyśmiejvać uładu i jaje pradstaŭnikoŭ, zjaŭlajecca prykmietaj dziejnaj demakratyi», — nastojvaje jana i dadaje: «Šmat u čym była piarojdziena miaža: nie miaža zakona, a pavahi i hodnaści».
Adzin z kiraŭnikoŭ Radio France na ŭmovach ananimnaści adznačyŭ: «My nie možam padazravać Hijoma ŭ antysiemityźmie. Ale žartavać na hetuju temu ŭ taki trahičny momant, jak toj, jaki my pieražyvajem, vielmi ryzykoŭna». Pa jaho słovach, hety vypadak moža ŭdaryć pa papularnaści radyjostancyi.
Sam Miorys adkazaŭ na krytyku ŭ X (były Twitter), spasyłkami na svaich kumiraŭ — śpievaka Žorža Brasansa (Georges Brassens) i časopis Charlie Hebdo, jakija taksama vykarystoŭvali satyru i pravakacyju ŭ svajoj tvorčaści.
Pad chešteham #jesuischarlie jon apublikavaŭ malunak pad nazvaj «Vynachodnictva humaru», na jakim dahistaryčny čałaviek rychtujecca padnieści kubak z alejem bližej da pałajučaj pachodni.
Miorysa padtrymała jaho kaleha na pieradačy Šarlina Vanienakier (Charline Vanhoenacker). Jana adznačyła, što Hijom nie antysiemit, jon tolki krytykavaŭ palityku Nietańjachu. Vanienakier taksama pryznała, što ŭ ciapierašniaj atmaśfiery nianaviści humar staŭ vielmi składanym i ryzykoŭnym žanram.
Jak paviedamlajecca, žart Miorysa z adsyłkaj da abrazańnia i nacyzmu budzie pravierany Upraŭleńniem pa rehulavańni aŭdyjavizualnych i ličbavych kamunikacyj (Arcom).
Le Monde adznačaje, što heta nie pieršy vypadak, kali humarysty kanała France Inter sutykajucca z krytykaj za svaju satyru na palityku, jakaja zjaŭlajecca častkaj duchu stancyi. Raniej inšy humaryst Frederyk Frame (Frédéric Fromet) prynosiŭ prabačeńni za svaje pieśni ab adnapołym kachańni i karydzie, jakija byli niapravilna zrazumietyja abo asudžanyja niekatorymi słuchačami.
Čytajcie jašče: