Biełaruskim studentam u Polščy nie vypłačvajuć stypiendyju bolš za paŭhoda. Što adbyvajecca?

Prahrama EU4Belarus nakiravanaja na toje, kab padtrymać represavanuju akademičnuju supolnaść u krainach Jeŭrasajuza. Ale studentam z Polščy pakul ničoha nie vypłacili, choć akademičny hod zakančvajecca. Daviedalisia, z čym źviazanaja zatrymka i ci budzie nabor na prahramu ŭ nastupnym hodzie.

Kałaž «Našaj Nivy»

«Mocna rasčaravanyja»

Studenty roznych VNU ŭ Polščy i Čechii raskazali nam, što stypiendyju musili pačać vypłačvać z kastryčnika. Ale hetaha nie adbyłosia. Adzin sa studentaŭ patłumačyŭ «Našaj Nivie» situacyju:

«Pastupiŭ va Univiersitet imia Adama Mickieviča ŭ Poznani. A ŭ žniŭni daviedaŭsia, što atrymaŭ stypiendyju. Było šmat abiacanak.

Spačatku skazali, što zatrymki buduć, ale ŭ śniežni dakładna vypłaciać. Potym kazali, što pad Novy hod zapłaciać, potym — što ŭ lutym. I hetak dalej.

Jašče nam skazali, što patrebna budzie padpisanaja rektaram daviedka, što ty ŭ druhim siemiestry vučyšsia, kab zapłacili nie tolki za pieršy».

Inšyja studenty kazali, što jany mocna rasčaravanyja takoj zatrymkaj. Choć stypiendyja i paraŭnalna nievialikaja, kala 450 jeŭra na miesiac, ale jana stała b vielmi važnaj finansavaj padtrymkaj dla tych, chto apynuŭsia ŭ emihracyi.

«Robim usio mahčymaje»

ES užo daŭno vydzieliŭ hrošy na prahramu, ale za raźmierkavańnie hrošaj adkazvaje kampanija SRMA (Central Project Management Agency).

U Polščy jaje musiła pradstaŭlać NAWA (Nacyjanalnaje ahienctva akademičnych abmienaŭ). Praź nieviadomyja razychodžańni ŭźnikła prablema z zaklučeńniem damovy pamiž CPMA i NAWA, damovu ŭ vyniku sa skrypam zaklučyli ŭ mai.

My zapytalisia ŭ pradstaŭnicy SRMA, što adbyvajecca i kali studenty mohuć raźličvać na stypiendyju:

«Prahrama EU4Belarus — SALT z 2021 hoda daje stypiendyi dla studentaŭ, adličanych pa palityčnych matyvach abo zmušanych vyjechać pa palityčnych matyvach.

Z momantu zapusku stypiendyi atrymali sotni studentaŭ. Vypłačana ahułam bolej za dva miljony jeŭra.

Pa techničnych pryčynach u dźviuch z čatyroch krainaŭ-udzielnic praces vydačaŭ zaciahnuŭsia. My robim usio mahčymaje, kab u najbližejšy čas pytańnie vyrašyłasia, i infarmujem udzielnikaŭ pra prahres, a taksama starajemsia adkazvać na pytańni. My spadziajemsia, što nieŭzabavie zdolejem skazać kankretnyja daty.

Na nastupny hod nabor pa hetaj prahramie nie płanujecca».

Hrošy pakul nie vypłacili

My atrymali adkaz ad CPMA naprykancy maja 2024 hoda. Prablema vyrašyłasia tolki ŭ Čechii, ale taksama byli składanaści.

A voś hrošy polskim studentam pakul tak i nie vypłacili.

«Praz toje, što prahrama ŭ Polščy prachodzić praz NAWA, a jany majuć svaje patrabavańni, nam treba jašče raz padavacca na stypiendyju praź ichniuju sistemu. Jany paprasili dasłać nam paŭtornaje paćvierdžańnie, što my studenty.

Ciapier my štomiesiac musim słać im paćvierdžańnie taho, što my vučymsia, pryčym nie na elektronnuju poštu, a na zvyčajnuju. Ciapier čakajem damovu pamiž studentami i NAWA, kab atrymać hrošy.

Terminy nam nieviadomyja i niezrazumiełyja. NAWA taksama nie kaža, kali heta adbudziecca», — kaža adzin sa studentaŭ, jakija čakajuć stypiendyi.

Kamientary da artykuła