Top niebanalnych padarunkaŭ na lubuju nahodu ad biełaruskich majstroŭ
Zdajecca, mnohija choć raz zadavalisia pytańniem, što padaryć siabru ci zamiežniku, da jakoha vy sabralisia ŭ hości, dy tak, kab heta było ź biełaruskim vajbam. Asabliva vostra takaja prablema moža paŭstavać za miažoj, bo ŭ samoj krainie, što ni kupi — jano ž pa zmoŭčańni biełaruskaje, budź toje zhuščonka ci škarpetki Mark Formelle dy rečy ajčynnych dyzajnieraŭ. Sabrali dla vas top niebanalnych prezientaŭ, jakija vy možacie nabyć za miažoj i paradavać ci blizkich, ci siabie lubimaha.
Śviečki z pacham Biełarusi
Śviečki dadajuć utulnaści lubym pamiaškańniam, asabliva ŭ chałodnyja viečary, jakija nie za harami. A kali jany buduć pachnuć rodnymi sercu miaścinami? Mienavita takija robić śviečkavar Kaciaryna, jakaja stvaryła brend Dumki candles. Možna vybrać pach parka Horkaha, Bataničnaha sadu ci Kamaroŭki abo toj samy, viaskovy, jaki adčuvaŭsia padčas vizitaŭ da babuli.
Košt: 20 jeŭra
Pavuki i sałamianyja aksesuary
Sałamianyja pavuki zdaŭna byli abiareham našych prodkaŭ, zaklikanyja abaraniać dom ad luboha zła. A jašče heta vyhladaje vielmi stylova ŭ interjery, pahadziciesia? Kupić śpiecyjalny boks ź instrukcyjami pa stvareńni svajho pavučka možna ŭ brenda Kanva za 35 jeŭra.
Jany ž stvarajuć stylovyja aksesuary z sałomy — zavušnicy, abručy i navat karony dla tych, chto adčuvaje ŭ sabie ŭładarny duch.
Harlački i kieramičnyja karali
Harlački i karali z adsyłkaj da tych, jakija nasili našy babuli, znojdziecie ŭ prajekta «Etyka». Ceny varjirujucca ad 30 da 45 jeŭra, u zaležnaści ad składanaści vyrabu.
A dalikatnyja ŭpryhožvańni z natchnialnymi nadpisami pra toje, što važna być sabie samoj muzaj, ci pra toje, što dom tam, dzie serca, adšukajecie ŭ majstrychi-kieramistki, stvaralnicy brenda Atmasfiera.
Cišotki na luby hust
Čaho-čaho, a niedachopu ŭ cišotkach z roznymi biełaruskimi miemami ci vobrazami i nadpisami siońnia niama. Źjaŭlajeciesia fanatam Marka Šahała? Možna zamović tematyčnuju majku ad Biel kalaryt. Šmat humarystyčnych pryntoŭ jość u Znivien ci «Ptułchu», histaryčnaj tematyki — u «Vobłaka» ci PRALIŬ. I navat rusałak z «monnom» možna nasić na sabie, a jašče «firanki», dziakujučy Tsuda Project.
Stary dobry Symbal.by zaŭsiody paraduje pravieranymi časam pryntami. Taksama ŭ ich možna zamović znački, kiepki i roznyja torby.
Afłajn-alternatyva ź biełaruskim mierčam u Vilni — krama siamji Furmanavych «Kropka» ci suvienirka ad «A2 print». Ź vialikim vybaram chudzi, vokładak dla pašparta i navat bializny možna aznajomicca na sajcie «A2 print».
Biełaruskija nastołki i mazaiki
Sabrać mazaiku «Bitva pad Voršaj», jakaja składajecca z 1000 pazłaŭ? Hučyć jak vyklik. Heta moža stać dobraj zabavaj dla viečara ź siabrami. Cana pytańnia — 17 jeŭra.
Kali vy nie fanat drobnych detalaŭ, dobraj alternatyvaj mohuć stać nastołki — naprykład, biełaruskaja viersija «Ja nikoli nie». Ci 52 kartki, jakija dapamohuć vam daviedacca pra kožnaha ŭ kampanii jašče lepš (ci navat pra siabie, bo pytańni ŭ hulni — dobraja nahoda dla samarefleksii).
Piarścionak ź lubym nadpisam
Piarścionak z nadpisam, jaki natchniaje ci prosta šmat dla vas značyć, — kłasny padarunak dla tych, chto lubić nasić upryhožańni na palcach. U majsterni «Make.sense» pieratvorać u žyćcio lubuju fantaziju.
Užo kultavyja srebnyja padvieski-kontur Biełarusi ad juvielirnaha brenda BELARUSKICRY, zdajecca, u prezientacyi nie majuć patreby. Ale kali vy nie viedali, u ich jašče jość i sieryja piarścionkaŭ, pryśviečanych biełaruskim arnamientam.
Ceny — ad 80 dalaraŭ.
Ułasny vahon mietro ci domik z Asmałoŭki
Stać uładalnikam nieruchomaści možna vielmi prosta — pačać chacia b z domika z Asmałoŭki ŭ minijaciury. Ich, a jašče panelki z dreva stvaraje mastak Andrej Busieł. Adnym rucham ruki jany pieraŭtvarajucca ŭ lampy, jakija buduć aśviatlać vašy damy ciomnymi viečarami, dadajučy ŭtulnaści z prysmakam nastalhii.
Ceny — ad 70 jeŭra.
Knižki i paštoŭki
Kali vy z tych, chto ŭpeŭnieny, što kniha — najlepšy padarunak pa luboj nahodzie, to vam da «Knihaŭki» anłajn ci afłajn. U kramie pastajanna dadajucca biełaruskamoŭnyja navinki. «Vaładar piarścionkaŭ» — prosta mastchev dla kožnaj chatniaj biblijateki.
Cikavyja sučasnyja vydańni taksama pradajucca ŭ varšaŭskim «Domie busłoŭ» — naprykład, «Moje baba — diriektor morha» pra žyćcio na Paleśsi.
U Vilni knihi možna znajści ŭ Biełaruskim domie, a taksama ŭ kramie «Hartajka».
Kłasnym kamplimientam-suvieniram moža stać nabor stykieraŭ ci paštoŭki. Jak vam, naprykład, stykierpak, pryśviečany biełaruskamu transpartu?
Ci mienavita žyvyja, nie nadrukavanyja paštoŭki ad mastački Taćciany Kałač?
Posud dla samych smačnych pryjomaŭ ježy
Raniej my ŭžo pisali pra siastru palitviaźnia Maksima Znaka — Irynu Kozikavu, jakaja pajšła z advakatury i ciapier zajmajecca kieramikaj. Natchnialnyja nadpisy pa-biełarusku, adsyłki da našaj pryrody i vobrazaŭ — hałoŭnyja fiški jaje posudu.
Ahułam za miažoj pracuje šmat biełaruskich majstroŭ, tak što kožny znojdzie niešta sabie pa dušy: naprykład, kubki-tvaryki ad Uliclay ci trendavyja formy i kolery ŭ Naranovich Ceramics.
Ježa
Kali padarunak nie treba vieźci zadaloka i pieražyvać, što jon sapsujecca, to smačniachi da kavy i harbaty nikoli nie buduć lišnimi. Tym bolš, čaho tolki nie robiać biełarusy svaimi rukami. Naprykład, śmiatańniki i pirožnyja-bulbački, hłazuravanyja syrki ci torty na luby smak, trubački i areški sa zhuščonkaj, i tematyčnuju kavu ŭ drypach «Duch radzimy».
Čytajcie taksama:
Jak kambinavać rečy z nacyjanalnymi matyvami z sučasnymi? Idei ad modnych biełarusak i biełarusaŭ
Što budzie ź biełaruskimi sekandami paśla zabarony Jeŭrasajuza na ŭvoz adzieńnia? Spytali ŭ ich