Danija vydatkuje 700 000 jeŭra na padtrymku represavanych u Biełarusi i ich siemjaŭ
Śviatłana Cichanoŭskaja pačała pracoŭny vizit u Isłandyju, asnoŭnaja meta jakoha — udzieł u 76-j siesii Paŭnočnaj Rady.
Fota: OSC
Śviatłana Cichanoŭskaja pačała pracoŭny vizit u Isłandyju, asnoŭnaja meta jakoha — udzieł u 76-j siesii Paŭnočnaj Rady, paviedamlaje jaje pres-słužba.
U arhanizacyju ŭvachodziać Danija, Finlandyja, Isłandyja, Narviehija i Šviecyja, a taksama Hrenłandyja, Farerskija i Ałandskija astravy. Hałoŭnaja zadača Paŭnočnaj Rady — sadziejničać palityčnamu, ekanamičnamu i kulturnamu supracoŭnictvu pamiž paŭnočnymi krainami i ich parłamientami.
Akramia ŭdziełu ŭ pasiadžeńniach siesii, biełaruskaja lidarka sustreniecca ź ministram zamiežnych spravaŭ Danii Łarsam Lokie Rasmusienam.
Napiaredadni pieramovaŭ ź Cichanoŭskaj paŭnočnyja krainy paćvierdzili padtrymku «Mižnarodnaha humanitarnaha fondu» dapamohi biełaruskim palitviaźniam. U pryvatnaści, ministr Rasmusien adznačyŭ: Danija vydatkuje ŭ 2024 hodzie 5 miljonaŭ dackich kronaŭ dla fondu (700 tysiač jeŭra).
«My vielmi ŭdziačnyja Danii i ŭsim paŭnočnym krainam za salidarnaść i padtrymku. Siońnia tysiačy ludziej znachodziacca za kratami, tysiačy represavanych i ich siemjaŭ patrabujuć dapamohi, reabilitacyi i lekavańnia. Vašaja salidarnaść daje nadzieju, enierhiju, a hałoŭnaje — upeŭnienaść, što my nie zastaniemsia sam-nasam sa svajoj biadoj. Dziakuj», — skazała Śviatłana Cichanoŭskaja.
Raniej Mižnarodny humanitarny fond padtrymali Narviehija i Šviecyja. Za hety hod udałosia sabrać bolš za 2 miljony jeŭra ŭ padtrymku fondu.