«Alaksiej Hryšyn zaŭsiody vałodaŭ jakaściami pieramožcy» - načalnik kamandy
Zavajavać alimpijskaje «zołata» Alaksieju Hryšynu dapamahli samavałodańnie i stabilnaść. Takuju dumku vykazaŭ načalnik nacyjanalnaj kamandy Biełarusi pa frystajle Anatol Pastuchoŭ.
«Heta histaryčnaja, nadzvyčaj jarkaja i ŭ peŭnaj stupieni niečakanaja padzieja. Kraina atrymała pieršaha alimpijonika ŭ zimovych vidach sportu», — adznačyŭ Pastuchoŭ.
Pavodle jaho słoŭ, kankurentazdolnyja byli ŭsie čatyry biełaruskija frystajlisty: Alaksiej Hryšyn, Dźmitryj Daščynski, Cimafiej Śliviec i Anton Kušnir. «Pytańnie ŭ tym, chto moža ŭ kankretnaj situacyi prademanstravać usio, što ŭmieje, a kamu niejkija pryčyny mohuć nie dazvolić heta zrabić.
Alaksiej zaŭsiody vałodaŭ jakaściami pieramožcy», — skazaŭ načalnik kamandy.
«Napiaredadni my havaryli: toj spartsmien, jaki ŭ finale zrobić dźvie dobryja sproby, moža raźličvać na pośpiech. Tak i adbyłosia. Akramia samavałodańnia Alaksieja spracavała i małankavaje praličvańnie ŭsich niuansaŭ situacyi.
Jon vielmi surjozna rychtavaŭsia, a vopytu jamu nie zajmać», — ličyć Pastuchoŭ.
Jon adznačyŭ, što niepapadańnie ŭ finał miedalnaj nadziei Antona Kušnira «azadačyła» kamandu i ŭ «peŭnaj stupieni nakłała dadatkovuju adkaznaść na inšych».
Kamientujučy 11‑ie miesca Daščynskaha, Pastuchoŭ adznačyŭ, što dla papadańnia ŭ pryziory jamu nieabchodna było vykanać pieršuju sprobu na tym ža ŭzroŭni, što i druhuju. «Paŭpłyvała nievialikaja pamyłka. Na treniroŭkach i raźminkach i Daščynski, i Kušnir vykonvali ŭsio z zapluščanymi vačyma. Ciažka ŭleźci ŭ dušu spartsmiena i zrazumieć, što paŭpłyvała na jaho, ale adna pamarka viadzie da takoha vyniku. Toje ž samaje Śliviec: druhuju sprobu jon zrabiŭ niajakasna i zaniaŭ dzieviataje miesca. Patrebny ŭstojlivaść i stabilnaść», — skazaŭ načalnik kamandy.
Pastuchoŭ adznačyŭ vystupleńnie Asol Śliviec, jakaja napiaredadni ŭ žanočym finale zaniała čaćviortaje miesca. «My havorym joj vialikaje dziakuj paśla taho, jak jana naradziła i pačała nastojliva treniravacca. Liču, heta narmalnaje miesca. Jana prajaviła maksimum starańnia», — skazaŭ Anatol Pastuchoŭ.
Jašče adna biełaruskaja frystajlistka Ała Cupier, vyjhraŭšy kvalifikacyju, była ŭ finale tolki vośmaj. «My viedajem jaje niedachopy. Jana hublajecca. Kali b jana vystupiła tak, jak u kvalifikacyi, pytańniaŭ by nie było. Heta śfiera psichałohii. Akramia taho, jana nie da kanca adnaviłasia paśla traŭmy i mahła ŭvohule nie vychodzić na start. Tamu pradjaŭlać pretenzii nie treba. Jana čałaviek vielmi addany i pracavity», — padkreśliŭ Pastuchoŭ.
Na jaho dumku, Cimafiej i Asol Śliviec mohuć pakazać vielmi vysokija vyniki na nastupnych Alimpijskich hulniach u Sočy.