Pryznačany novy rektar EHU — iznoŭ nie biełarus
Kiraŭničaja rada i Usieahulny schod saŭładalnikaŭ Jeŭrapiejskaha humanitarnaha ŭniviersiteta paviedamili pra abrańnie doktara Vilusa Šadaŭskasa rektaram EHU terminam na piać hadoŭ.
Vilus Šadaŭskas. Fota: EHU
Jon atrymaŭ stupień doktara adukacyi va Univiersitecie Vitaŭta Vialikaha i stupień bakałaŭra i mahistra historyi ŭ Litoŭskim univiersitecie piedahahičnych navuk. Vybrany ŭ pracesie konkursnaha pošuku siarod trynaccaci kandydataŭ ź piaci krain, spadar Vilus aficyjna prystupić da vykanańnia abaviazkaŭ rektara 6 studzienia 2025 hoda.
Vilus dałučyŭsia da EHU ŭ 2018 hodzie i chutka dasiahnuŭ vyšejšych kiraŭničych pasadaŭ: pierad tym jak stać vykanaŭcam abaviazkaŭ rektara ŭ sakaviku 2024 hoda, jon pracavaŭ kiraŭnikom adździeła stratehičnaha płanavańnia i kancleram.
Kiraŭničyja orhany EHU abrali spadara Vilusa, zychodziačy ź jaho adpaviednaści patrabavańniam da pasady rektara, jaho dobraj pracy ŭ jakaści vykanaŭca abaviazkaŭ rektara, jaho pierśpiektyŭnaha bačańnia budučyni EHU i doŭhaj addanaści ŭstanovie, havorycca ŭ paviedamleńni ŭniviersiteta.
Adznačajecca, što spadar Vilus zastupaje na pasadu rektara ŭ čas nadzvyčajnych vyklikaŭ i imklivych źmienaŭ va ŭniviersitecie i ŭ rehijonie. Atrymaŭšy sioleta akredytacyju na siem hod, vyšejšaje kiraŭnictva ŭstanovy zasiarodzić uvahu na pavieličeńni naboru, pavyšeńni navukova-daśledčaha patencyjału, pašyreńni śpiektru prahram i ŭmacavańni finansaŭ univiersiteta.