Supracoŭnica Polskaha instytuta mižnarodnych adnosin zajaviła, što joj cikavicca KDB Biełarusi
Analityk prajekta Polityka Insight, supracoŭnica Polskaha instytuta mižnarodnych adnosin Hanna Maryja Dyner, jakaja śpiecyjalizujecca na temie Biełarusi, zajaviła, što trapiła na «pryceł» biełaruskaha KDB, piša Radyjo Svaboda.
Pra heta Hanna Maryja Dyner raskazała ŭ intervju prajektu Didaskalia. Jana pačała z taho, što apošnim časam jana z kalehami šmat pisała pra mihracyjny kryzis, pamyłki Łukašenki, usio bolšuju zaležnaść Biełarusi ad Maskvy i inšyja temy, što datyčacca dyktatury ŭ susiedniaj dziaržavie.
Palitołah adznačyła, što takuju dziejnaść zhadali ŭ prapahandysckim filmie na telekanale ANT, kali tam raskazvali pra kalehu Dyner Andreja Parotnikava, jakoha asudzili na turemny termin.
Dyner adznačyła, što kalehi chutka zrazumieli, što Parotnikava zmušajuć da pravakacyi suprać kaleh, što nie pieraškodziła prapahandystam Łukašenki vykarystać niekatoryja momanty listavańnia ŭ svaim filmie.
Dyner dadała, što ŭ kancy leta 2022 hoda adčuła, što sama apynułasia na «prycele» biełaruskaha KDB. Jana była ŭ Supraśli na Padlaššy i atrymała paviedamleńnie pra toje, što adzin z padazravanych u špijanažy šukaŭ jaje kantaktaŭ. A praz paŭhoda jana atrymała list ad Vajennaj prakuratury, što źjaŭlajecca paciarpiełaj u spravie.
Vyśvietliłasia, što ŭ adnym horadzie Vialikapolskaha vajavodstva palicyjant niezakonnym sposabam šukaŭ źviestki pra Dyner, što paźniej vykryła rasśledavańnie suprać padazravanaha ŭ špijanažy. Były padnačaleny palicyjanta, jaki, jak vyśvietliłasia taksama paźniej, mieŭ suviazi ź mierkavanym špijonam, paprasiŭ kalehu pašukać hetyja źviestki, nie kažučy, navošta jany jamu.
Takim čynam, u šerahu situacyj z pracaj špijonaŭ polskich supracoŭnikaŭ słužbaŭ vykarystoŭvajuć «uciomnuju», kab zdabyć kaštoŭnuju dla śpiecsłužbaŭ Łukašenki i Pucina infarmacyju, ličyć jana. Hetaja historyja, na dumku Dyner, pakazała, što ŭ sučasnaj Polščy niedaskanałaja sistema abarony.
Akramia taho, Hanna Dyner zhadała zdareńnie z aŭtamabilem, ale nie raskryła padrabiaznaściej.
Pra pahrozy z boku ŭładaŭ Biełarusi raniej kazali namieśnik staršyni Abjadnanaha pierachodnaha kabinieta Pavieł Łatuška i kiraŭnik Biełaruskaha doma ŭ Varšavie Aleś Zarambiuk.