Biełarus pajšoŭ u sud, kab viarnuć zakład na arendu žylla ŭ Polščy
Załoh na arendu žylla (abo «kaucyja») dla mnohich biełarusaŭ u Polščy — hałaŭny bol. Tak, na žal, niekatoryja ŭładalniki kvater nie chočuć jaho viartać.
Adzin ź biełarusaŭ hatovy iści ŭ sud, kab viarnuć svaje hrošy. Jon padzialiŭsia karysnymi łajfchakami i navat tekstam dasudovaj pretenzii, piša Dzic Pic.
— Čamu ja vyrašyŭ padzialicca svajoj historyjaj? Kab dapamahčy biełarusam, ukraincam, pryjezdžym u Polščy viartać svaje hrošy. Bo ruskamoŭnaja infarmacyja pra viartańnie zakładu, na maju dumku, nie zusim karektnaja.
Ja žyvu ŭ Krakavie. U Polščy ŭžo bolš za try hady, a kankretna hetuju kvateru my z žonkaj zdymali apošnija dva hady. Źjechali, bo kupili svajo žyllo.
Zdymnuju kvateru znajšli sami, biez ryełtaraŭ. Damovu padpisali standartnuju: što haspadar maje prava ŭtrymać zakład, kali znojdzie jakija-niebudź niedachopy; budzie vymušany pravieści prybirańnie, ramont i h. d. To-bok hety punkt adpaviadaje zakonu pra abaronu pravoŭ arandataraŭ.
Mała chto viedaje, ale kali punkty damovy zdymu žylla supiarečać zakonu, to ŭ vypadku jurydyčnych ciažbaŭ jany buduć ličycca niesapraŭdnymi i nie bracca pad uvahu.
Taksama ŭ damovie było prapisana, što zakład viartajecca na praciahu 30 dzion ad momantu vysialeńnia, kali ŭ haspadara adsutničajuć jakija-niebudź pretenzii. Paśla ja bačyŭ, što ŭ inšych damovach mohuć paznačać navat 120 dzion na viartańnie zakładu. Ale terminy bolšyja za 30 dzion nie majuć jurydyčnaj siły.
Pry pieradačy klučoŭ ja nie padpisvaŭ akta pieradačy-pryjomki. Ale paśla na biaspłatnaj kansultacyi ź jurystam ja daviedaŭsia, što hety dakumient nieabaviazkovy. Jaho mohuć zamianić pakazańni śviedak, što ty sapraŭdy vysieliŭsia z kvatery, albo SMS abo piśmovaje apaviaščeńnie ŭładalniku ab viartańni klučoŭ, a taksama adsutnaść ad jaho pretenzij na praciahu 30 dzion (heta važna!).
Tak, mała chto viedaje, ale ŭ kožnym horadzie, užondzie jość biaspłatnaja jurydyčnaja dapamoha. Dla Krakava isnuje admysłovaja staronka z takoj infarmacyjaj.
Pryčym ty možaš navat pakazać, što niedastatkova dobra vałodaješ polskaj movaj, i tabie padbiaruć śpiecyjalista. Heta nie patrabuje nijakich dokazaŭ z vašaha boku. Prosta zajaŭlajecie: «Ja nie mahu apłačvać dapamohu, prašu akazać jaje biaspłatna». Telefanujecie, i vam dajuć svabodny słot užo siońnia.
Ja ŭžo dva razy naviedvaŭ takuju kansultantku. Pieršy raz jana dapamahła mnie skłaści dasudovuju pretenziju, druhi — iskavuju zajavu na haspadara. Heta absalutna biaspłatna. Ja heta kažu, bo mała chto viedaje, što padobnyja biaspłatnyja jurysty mohuć dapamahčy mienavita ź viartańniem zakładu.
«Nie daŭ anivodnaha čeka. Dumaju, u jaho ich i niama. Tolki piša vialikija listy, i ŭsio»
— Addaŭšy haspadaru klučy, ja staŭ telefanavać i pytacca, kali ž mnie viernuć zakład, bo pry vysialeńni jon skazaŭ: «Ušystka ŭ pažondku, zaraz pieraličać kamunalnyja, i ja adpraŭlu vam sumu».
Ale ŭ naležnyja 30 dzion jon na suviaź nie vyjšaŭ. 1 studzienia, praz 30+ dzion, jon dasłaŭ dakumient, u jakim napisaŭ, što zrabiŭ pieraraźlik za kamunalnyja pasłuhi, i jany skłali 700 złotych (kala $172).
Pakolki suma zakładu skłała 3500 złotych (prykładna $863), ja raźličvaŭ na viartańnie 2800 złotych (kala $690). Napisaŭ z pytańniem, kali ich čakać. Adnak haspadar kvatery adkazaŭ, što paśla nas treba było vielmi šmat ramantavać i prybirać (choć my z žonkaj zakazvali klininh i potym sami jašče prybirali), i što jon dašle kančatkovuju sumu paźniej.
Choć, pa sutnaści, na toj momant prajšło ŭžo 35 dzion. A pa zakonie, kali ŭładalnik žylla nie zajaviŭ na praciahu 30 dzion ad momantu vysialeńnia pra namier utrymać ź ciabie hrošy, to jon nie maje ŭ dalejšym nijakaha prava ź ciabie štości vymahać.
Ja pačaŭ huhlić, što možna zrabić. Znajšoŭ servis kaucja365.pl, jaki stvaryli biełarusy. Pasprabavaŭ dadać svaju damovu, ale, jak vyjaviłasia, ciapier aŭtamatyčnaja sistema nie pracuje. Ja napisaŭ im na mejł, i praz paru dzion jany mnie vysłali šabłon pretenzii. Ale, kali ščyra, jon mnie zdaŭsia nie zusim prafiesijnym. Ja jaho navat nie vykarystoŭvaŭ. Cikava, što jany zrabili hety servis. Kali chtości zmoh pa ich šabłonie viarnuć hrošy, to kruta, ale ŭ mianie byli pytańni.
Zamiest hetaha ja źviarnuŭsia da biaspłatnaj jurystki va ŭžondzie, i jana dapamahła mnie skłaści bolš prafiesijnaje «wezwanie do zapłaty», sa spasyłkami na zakony i inšaje. Kali kamu treba, to fajł tut.
Razam ź jurystkaj my nakiravali dasudovuju pretenziju panu. Jon list nie zabraŭ i paśla hetaha staŭ pahražać, što padaść na mianie sustrečny pazoŭ na 10 tysiač złotych (prykładna $2465).
Jaho pretenzija palahaje ŭ tym, što pry pieraklejcy špaler u adnym z pakojaŭ adpłastavałasia tynkoŭka (hetyja špalery adychodzili ad ściany, jašče kali my ŭsialilisia). I na indukcyjnaj plicie, jakoj hadoŭ 10, stali drenna pracavać knopki, što vidavočna traplaje pad vyznačeńnie naturalnaha znosu.
Adnak jon jašče nie daŭ anivodnaha čeka. Dumaju, u jaho ich i niama, inakš by jon daŭno ŭžo vysłaŭ i my b užo zakryli hetaje pytańnie. A tak jon tolki piša vialikija listy, i ŭsio.
U maich płanach — nie pałochacca, a iści da kanca. Ja maju namier źviarnucca ŭ sud i hatovy paśla raskazać pra vyniki, tym bolš što ŭ mianie ŭžo jość dośvied raźviazańnia spraŭ u dasudovym paradku ŭ Polščy. Takija rečy — jak čelendž: choć i stresova, ale cikava.