Tramp choča pravieści samit z udziełam Si Czińpina i Pucina
Takaja sustreča moža źmianić suśvietny paradak.
Fota: Christopher Furlong / Getty Images
U čaćvier Donald Tramp pradstaviŭ niezvyčajnaje bačańnie suśvietnaha paradku, razvažajučy pra trochbakovuju sustreču z rasijskim i kitajskim lidarami ŭsiaho praź dzień paśla taho, jak jon zajaviŭ, što damoviŭsia z Uładzimiram Pucinym ab pačatku mirnych pieramoŭ pa Ukrainie, paviedamlaje Hołas Amieryki.
U toj čas jak Kijeŭ i jeŭrapiejskija stalicy ŭsio jašče šakavanyja niečakanym zvankom Trampa Pucinu, prezident ZŠA taksama zajaviŭ, što jon «chacieŭ by» viarnuć Rasiju ŭ G7, ź jakoj jaje vyklučyli ŭ 2014 hodzie paśla anieksii Maskvoj Krymskaha paŭvostrava.
«Ja dumaju, što było pamyłkaj jaho vyhaniać», — skazaŭ Tramp žurnalistam u Avalnym kabiniecie, majučy na ŭvazie Pucina.
Tramp, jaki na svaim druhim terminie prezientuje siabie jak hłabalnaha miratvorca, taksama padkreśliŭ, što razhledzić mahčymaść praviadzieńnia samitu z Pucinym i Si Czińpinam, «kali ŭsio supakoicca».
«Kali my ŭsio ŭładkujem, ja chaču, kab adna z maich pieršych sustreč adbyłasia sa staršyniom KNR Si i kiraŭnikom Rasii Pucinym. I ja chaču im skazać: davajcie skarocim naš vajenny biudžet napałovu», — adznačyŭ amierykanski prezident.
Prezident ZŠA, jaki prymaŭ u čaćvier premjer-ministra Indyi Narendru Modzi ŭ Biełym domie, taksama zaklikaŭ try dziaržavy pačać skaračeńnie svaich jadziernych arsienałaŭ.
«U nas niama pryčyn stvarać zusim novuju jadziernuju zbroju», — dadaŭ jon.
Donald Tramp nastojvaŭ i na tym, što kiraŭnik Rasii choča spynieńnia ahniu z Kijevam, niahledziačy na toje, što prezident Ukrainy Uładzimir Zialenski ŭ čaćvier papiaredziŭ amierykanskaha prezidenta, što tamu nie varta daviarać kremloŭskamu lidaru.
«Ja dumaju, što jon choča miru. Ja dumaju, što jon skazaŭ by mnie, kali b nie chacieŭ», — skazaŭ Tramp.
Tramp zrabiŭ hetyja zajavy paśla padpisańnia płanaŭ pa ŭviadzieńni kompleksnych «ŭzajemnych taryfaŭ», jakija mohuć udaryć jak pa kankurentach, tak i pa sajuźnikach.
Čytajcie taksama:
Tramp anansavaŭ sustreču pradstaŭnikoŭ Ukrainy, Rasii i ZŠA ŭ Miunchienie
Tramp i Pucin mohuć damovicca pra spynieńnie ahniu da Vialikadnia ci 9 maja
«Horš za Miunchien». Reakcyja jeŭrapiejskich palitykaŭ na zajavy Trampa ab pieramovach z Pucinym