Žarty brazilca pra Biełaruś razyšlisia pa sacsietkach. Jabaćki ŭžo nazyvajuć jaho bečebešnikam

Stendapier Jelizieŭ Roza-małodšy z Brazilii da pierajezdu ŭ Polšču amal ničoha nie viedaŭ pra Biełaruś. Ale ciapier jon cikavicca biełaruskimi navinami, sprabuje vyvučać našu movu i žartuje pra Łukašenku dla anhłamoŭnaj aŭdytoryi.

Jelizieŭ Roza-małodšy. Fota ź jaho instahrama

Tak atrymałasia, što Jelizieŭ Roza-małodšy pierajechaŭ u Polšču ŭ žniŭni 2020 hoda.

— Heta byŭ vielmi važny momant dla Biełarusi. Ja bačyŭ ludziej, jakija pratestavali i pačaŭ cikavicca krainaj — susiedkaj Polščy. Praź niekatory čas u mianie źjavilisia siabry-biełarusy, a jašče praz try hady ja sustreŭ svaju dziaŭčynu, jakaja taksama ź Biełarusi. Dziakujučy im ja šmat čaho daviedaŭsia: i pra historyju, i pra situacyju z movaj.

Surazmoŭca kaža, što vielmi choča adnojčy pajechać u Biełaruś, ale razumieje, što pakul heta niemahčyma praź niebiaśpieku.

Navat žartuje pra partał na miažy, dzie źnikajuć ludzi: «Pamiž Biełaruśsiu i Polščaj niama miažy — tam partał. Časam heta jak Chohvarts, dzie ciabie raptam mohuć zabrać u Azkaban».

@elijr.comedy THE BELARUSIAN BORDER ⚪️⚪️ #belarus #belarusian #borders #standupcomedy #poland #standupcomedy #comedy #ŽyvieBiełaruś #CapCut ♬ original sound - Eli Junior

Komik na scenie pryznavaŭsia, što z chvalavańniem naziraŭ za apošnimi vybarami ŭ Biełarusi: «Ja vielmi chvalavaŭsia, chto ž pieramoža, — kazaŭ stendapier i tłumačyŭ kantekst dla tych u zale, chto nie viedaje pra śpiecyfiku biełaruskich vybaraŭ. — U Biełarusi svaja śpiecyfičnaja sistema: kandydata, jaki nabraŭ bolš za ŭsio hałasoŭ, abjaŭlajuć prajhraŭšym Łukašenku».

Stendapam Jelizieŭ cikaviŭsia daŭno, hladzieŭ šmat vystupaŭ komikaŭ na YouTube i Netflix. A prykładna hod tamu ŭ jaho źjaviłasia mahčymaść samamu vyjści na scenu. Dapamoh Ciarencij Marynič — biełarus, jaki robić anhłamoŭny stendap.

— Jon zaprasiŭ mianie ŭ tur. Heta byŭ moj pieršy dośvied — vystupać u roznych haradach i krainach, pierad roznymi ludźmi. My hastralavali pa Polščy, potym naviedali i Daniju. I ŭsio heta adbyłosia vielmi chutka.

Ci zrazumiełyja anhłamoŭnaj aŭdytoryi žarty pra Biełaruś?

— Časam ludzi ździŭlajucca ci navat ličać, što niekatoryja rečy, jakija ja kažu, — niapraŭda, bo jany nie ŭ kursie padziej u Biełarusi. Navat u Polščy i Litvie ludzi časta nie viedajuć, što adbyvajecca ŭsiaho za niekalki hadzin jazdy ad ich — ci ŭvohule na miažy ich krainy. Ale ja liču, što maje žarty dapamahajuć danieści chacia b niejkuju infarmacyju. Ja raspaviadaju ludziam cikavyja fakty pra Biełaruś, pra jakija jany raniej nie viedali.

Jelizieŭ čuŭ, što Słavu Kamisaranku biełaruskija ŭłady pryznali «terarystam».

— Ja ŭpeŭnieny, što bojaź žartaŭ — heta nie vyklučnaja rysa biełaruskaha ŭradu. Takoje sustrakajecca ŭ kožnaj dyktatury. Bo praz žarty možna lohka pieradavać šmat infarmacyi, matyvavać ludziej parazvažać pra niešta. U luboj dyktatury bajacca, što ludzi zmohuć źmianić svajo myśleńnie pra krainu, pra sistemu. Tamu jany stvarajuć mif pra idealnaść svajho režymu (i toje, što ŭsiudy žyvuć značna horš) i vielmi nie chočuć, kab jaho razburali. U majoj krainie taksama była dyktatura, i ŭsio było vielmi padobna.

View this post on Instagram

A post shared by Eli Jr. - Comedy (@elijunior.comedy)

Dzie ž brazilski stendapier biare idei dla žartaŭ?

— Ja šmat čytaju biełaruskija naviny. Mnie cikava viedać, što adbyvajecca. Ja padtrymlivaju suviaź ź vialikaj kolkaściu biełarusaŭ. Napeŭna, u mianie bolš kantaktaŭ ź biełarusami, čym z palakami. Ja časta čuju historyi pra Biełaruś, pra padziei, niejkija cikavostki. Dla mianie heta ŭsio materyjał dla vystupleńniaŭ.

Praz žarty pra Biełaruś Jelizieŭ Roza-małodšy ŭžo sutyknuŭsia z chejtam — niechta ź biełarusaŭ-jabaciek, jakija žyvuć u Jeŭrasajuzie, nazvaŭ jaho bečebešnikam. Stendapier kaža, što nie viedaŭ, što hetaje słova značyć. Pryjšłosia vyśviatlać značeńnie:

— Kali daviedaŭsia, chto taki bečebešnik, ździviŭsia: bo ja ž navat nie biełarus, kab mianie tak nazyvać. Ale cikava, kaniešnie.

Jość i inšyja prykłady, kali ludzi, jakija byli na stendapie, paznajuć komika ŭ horadzie i kažuć: «Žyvie Biełaruś!».

— Mnie zdajecca, što žart, jaki ludziam zaŭsiody vielmi padabajecca, — heta toj, dzie ja raspaviadaju, jak my z majoj dziaŭčynaj robim adno adnamu siurpryzy. Ja vyrašyŭ zrabić joj siurpryz — pačaŭ vučyć biełaruskuju movu, a jana zrabiła siurpryz mnie — tym, što jaje nie viedaje.

Jelizieŭ Roza-małodšy kaža, što ŭ hetym žarcie tolki dola žartu. Bo dziaŭčyna jaho viedaje biełaruskuju movu, ale nie razmaŭlaje na joj.

— I takaja situacyja ŭ mnohich biełarusaŭ, ź jakimi ja znajomy. Heta cikava, bo pa-za Biełaruśsiu mnohija navat nie viedajuć, što moža isnavać moŭnaja prablema. Ja chacieŭ zakranuć hetu temu, bo ja jak brazilec nie razmaŭlaju na jakoj-niebudź «brazilskaj» movie — ja razmaŭlaju na partuhalskaj, movie kałanizataraŭ. I ja dumaju, što ŭ Biełarusi ŭ ludziej jašče jość mahčymaść zachavać svaju movu, kali jany buduć joj karystacca. Tamu ja liču važnym kazać pra nieabchodnaść razmaŭlać na biełaruskaj.

Sam stendapier sapraŭdy pačynaŭ vučyć biełaruskuju movu. Ale ciapier časova pieraklučyŭsia na vyvučeńnie ruskaj, bo choča rabić stendap u tym liku i pa-rusku.

— A kali moj uzrovień ruskaj palepšycca, ja viarnusia da vyvučeńnia biełaruskaj, — abiacaje chłopiec.

Kamientary da artykuła