U Mahilovie prajšło šeście da pamiatnaha znaku achviaram palityčnych represij

Akcyja, arhanizavanaja Mahiloŭskaj pravasłaŭnaj jeparchijaj 9 lutaha, prajšła amal niezaŭvažanaj, ale jana była, piša Mayday.team.

Spačatku archijepiskap Mahiloŭski i Mścisłaŭski Safronij pravioŭ liturhiju ŭ chramie Carstviennych pakutnikaŭ i ŭsich navamučanikaŭ XX stahodździa, jaki raźmieščany ŭ parku Horkaha ŭ centry Mahilova — heta skandalna adbudavanaja carkva na miescy staroha haradzišča ŭ pamiać pra rasijskaha cara Mikałaja II, čyju siamju rasstralali balšaviki.

Paśla liturhii častka viernikaŭ prajšła kałonaj z charuhvami praz paŭhorada da karjera nasuprać miasakambinata. Heta miesca viadomaje mahiloŭcam jak miesca masavych pachavańniaŭ paśla taho, jak u kancy 1980-ch tam byli vyjaŭlenyja čałaviečyja pareštki. Ułady pryznali, što mienavita tam pravodzilisia stalinskija rasstreły.

Raniej aktyvisty demakratyčnych partyj i arhanizacyj pravodzili ŭ hetym miescy mitynhi pamiaci, z kanca 1980-ch tam stajaŭ draŭlany kryž. Adnak u kastryčniku 2023 hoda padčas rekanstrukcyi praśpiekta Dzimitrava ŭ Mahilovie kryž byŭ zamienieny na pamiatny znak. Sam znak byŭ rusifikavany, na im źjaviŭsia nadpis «Hety kryž uźviedzieny ŭ pamiać raboŭ Božych, biaźvinna zabitych u dni lichalećcia 20-30 hadoŭ XX stahodździa».

Adnak mienavita na hetaje miesca paśla nabaženstva pavioŭ kałonu ijerej Andrej Šavaryn. I Chresny chod byŭ nazvany «na miesca rasstrełu achviar represij u 1930-ja hady». Milicyja akcyi nie pieraškadžała.

Kamientary da artykuła