Stała viadoma pra śmierć 47-hadovaha biznesmiena i byłoha palitviaźnia Dzianisa Bojdaka
Dzianis pamior u červieni 2024 hoda. Chutčej za ŭsio, jon byŭ na chimii za ŭdzieł u pratestach.
Dzianis Bojdak. Fota ź jahonaj staronki ŭ Adnakłaśnikach
Minčuku Dzianisu Bojdaku było 47 hadoŭ. Zhodna ź infarmacyjaj z sacsietak, paśla škoły vučyŭsia ŭ Instytucie sučasnych viedaŭ imia Šyrokava, a potym zaniaŭsia biznesam.
Bojdak bolš za 20 hadoŭ zajmaŭsia prodažam adzieńnia — optam i ŭ roźnicu — i mieŭ niekalki biznesaŭ. Da niadaŭniaha času ŭ Bojdaka było niekalki kropak pa Minsku, dzie pradavałasia adzieńnie.
Dzianis Bojdak. Fota ź jahonaha Facebook
8 červienia 2023 hoda ŭ Kastryčnickim sudzie Minska Dzianisa sudzili za ŭdzieł u pratestach pa «narodnym» artykule 342 Kryminalnaha kodeksa. U bolšaści padobnych vypadkaŭ čałaviek niekalki miesiacaŭ da suda znachodzicca ŭ SIZA, a paśla atrymlivaje chimiju — z nakiravańniem ci chatniuju, — i vyzvalajecca.
Dakładny prysud Bojdaku nieviadomy, ale, chutčej za ŭsio, jamu taksama dali chimiju.
30 červienia 2023 hoda, praź niekalki tydniaŭ paśla suda, milicyja ŭklučyła jaho ŭ śpis «ekstremistaŭ». Heta značyć, što Bojdak vyrašyŭ nie pisać apielacyju i prysud nabyŭ siłu.
Tym časam biznes sypaŭsia — uletku 2023 zakryłasia adna ź jahonych firmaŭ, IP było ŭ stanie likvidacyi. Zastałasia tolki adna jurydyčnaja asoba, da jakoj mieŭ dačynieńnie Dzianis i dzie jon byŭ dyrektaram.
Dzianis Bojdak pamior 4 červienia 2024 hoda. Pryčyna jahonaj śmierci nieviadomaja.
«Samy nieparušny čałaviek, jon vybiraŭsia ź luboha ha*na. Jon nikoli nie zdavaŭsia, što b ni adbyvałasia», — prakamientavała ŭ fejsbuku jaho siabroŭka. Dziasiatki čałaviek, jakija viedali Dzianisa, napisali słovy spačuvańnia.
Mahiła Dzianisa Bojdaka. Fota: pomnim.com.ua
Čytajcie taksama:
Stała viadoma pra śmierć 41-hadovaha byłoha palitviaźnia z Hrodna Alaksieja Aŭsiukieviča
Praz try miesiacy paśla vyzvaleńnia z navapołackaj kałonii pamior były palitviazień. Jamu było 48