Były dyktatar Arhienciny atrymaŭ 25 hadoŭ turmy
Rejnalda Bińjonie asudžany za złačynstvy suprać čałaviečnaści, ździejśnienyja amal 30 hadoŭ tamu.
Były vajenny kiraŭnik Arhienciny Rejnalda Bińjonie prysudžany da 25 hadoŭ turmy za złačynstvy suprać čałaviečnaści, ździejśnienyja amal 30 hadoŭ tamu.
U 1978—79 hadach hienierał Bińjonie pracavaŭ namieśnikam načalnika samaha vialikaha ŭ krainie łahiera katavańniaŭ — Kampa‑de‑Majio dy asabista addavaŭ zahady pra vykradańni ludziej i praviadzieńnie dopytaŭ.
Padčas praviadzieńnia sudovych słuchańniaŭ u Buenas‑Ajresie svajaki achviaraŭ režymu, zakatavanych u łahierach, trymali ŭ rukach fatahrafii svaich blizkich. Vyniesieny prysud jany sustreli radasnymi krykami.
Akramia hienierała Bińjonie, da roznych terminaŭ turemnaha źniavoleńnia byli asudžanyja jašče šaściora jaho paplečnikaŭ.
Spoźnienaje pravasudździe
82‑hadovy Rejnalda Bińjonie, jaki vykonvaŭ funkcyi prezidenta Arhienciny ŭ 1982‑83 hadach, byŭ pryznany vinavatym u zabojstvach, vykradańni ludziej i katavańniach — ahułam pa 56 epizodach.
Usie hetyja złačynstvy były dyktatar ździejśniŭ jašče da taho, jak uznačaliŭ krainu, u hady kiraŭnictva sumna viadomaj vajennaj bazaj Kampa‑de‑Majo pad Buenas‑Ajresam, jakaja faktyčna słužyła łahieram katavańniaŭ.
«Pravasudździe mocna spaźniłasia, ale narešcie jano tryjumfavała», — skazała Esteła de Karłota, jakaja uznačalvaje pravaabarončuju arhanizacyju «Babuli Płaca‑de‑Majio».
Pavodle pravaabaroncaŭ, u hady praŭleńnia Bińjonie zahinuli abo źnikli bieź viestak bolš za 30 tysiač čałaviek, jakija byli ŭ apazicyi da vajennych kiraŭnikoŭ Arhienciny.
Praviadzieńnie suda nad členami chunty stała mahčymym tolki paśla taho, jak u 2005 hodzie Viarchoŭny sud admianiŭ zakon ab amnistyi, što harantavała byłym kiraŭnikam krainy jurydyčnuju niedatykalnaść.