Akazvajecca, Kłačko, Mańko i Baranaŭ, jakija skazali, što vyjšli z KR z frakcyjaj «Vola», nikudy nie vychodzili
Jany ličać, što zastalisia ŭ Kaardynacyjnaj radzie, prosta sami pa sabie, biez frakcyi.
Alaksandr Kłačko
Praciahvajucca razborki vakoł frakcyi «Vola», jakaja 26 kastryčnika ŭračysta abvieściła ab vychadzie z Kaardynacyjnaj rady. Abviestka ŭ telehram-kanale frakcyi ilustravałasia zdymkam delehataŭ Alaksandra Kłačko, Alaksandra Kabanava, Hienadzia Mańko i Dźmitryja Baranava.
Pry hetym jašče dvoje ŭdzielnikaŭ «Voli», Vital Paciechin i Piatro Markiełaŭ, nie źbiralisia nikudy sychodzić, tamu stali pazafrakcyjnymi delehatami.
Adnak praź dzień vyśvietliłasia, što, akazvajecca, usie niapravilna zrazumieli Kłačko, Mańko i Baranava — jany taksama nikudy nie vychodzili, a chočuć zastavacca pazafrakcyjnymi.
«26.10.2025 ani Kłačko, ani Mańko, ani Baranaŭ nie pisali śpikieru KR albo sakrataryjatu zajavy ab indyvidualnym sychodzie (jak taho patrabuje Statut dla vyklučeńnia delehataŭ z KR indyvidualna). … Źviartajemsia da śpikiera KR Arcioma Bruchana z zapytam na pradastaŭleńnie infarmacyi: na padstavie čaho adbyłosia indyvidualnaje vyklučeńnie z KR delehataŭ Kłačko, Mańko, Baranava?», — havorycca ŭ novaj zajavie byłych udzielnikaŭ frakcyi «Vola».
Pra los Alaksandra Kabanava pry hetym ničoha nie havorycca. Vyhladaje, što jon, u adroźnieńnie ad byłych kaleh, vyjšaŭ z KR kančatkova.
Na vybarach u KR u 2024 hodzie śpis «Vola» atrymaŭ 432 hałasy ŭ svaju padtrymku, heta 6,43%.